"The Witcher 3: Wild Hunt" oyununun yaradıcısı olan CD Projekt Red studiyasının baş ssenaristi Marcin Blacha, mükəmməl oyun tapşırığının (kvest) hazırlanması ilə bağlı öz yanaşmasını açıqlayıb. PC Gamer-ə verdiyi müsahibədə o, ideal kvestin oyunçunu nəzarətçini kənara qoyub otaqda gəzişərək qərar verməyə məcbur etməli olduğunu bildirib.
Marcin Blacha-nın fikrincə, uğurlu bir kvestin iki əsas şərti var: seçimin aşkar olmaması və onun ciddi mənəvi çəkiyə malik olması. Ssenarist qeyd edib ki, bu cür tapşırıqların əsas məqsədi oyunçunu personajların problemlərinə dərindən bağlamaqla yanaşı, həyatın çətinlikləri və dünyanın quruluşu haqqında fəlsəfi düşüncələrə sövq etməkdir.
"Songs of the Past" əlavəsində oyunçuları nə gözləyir?
2027-ci ildə "The Witcher 3: Wild Hunt" oyunu üçün 11 ildən sonra ilk dəfə "Songs of the Past" adlı yeni süjet əlavəsi təqdim ediləcək. Marcin Blacha yeni macərada da çətin mənəvi dilemmaların olacağını təsdiqləyib. O, oyunçuların bəzən verdikləri qərarlardan peşman olacaqlarını və hətta əvvəlki yaddaş fayllarını (save) yükləməli olacaqlarını xəbərdar edib.
Qeyd edək ki, 10 il əvvəl işıq üzü görən "The Witcher 3: Wild Hunt" dünya üzrə 65 milyondan çox nüsxə satılıb. Oyun hazırda PC, PS4, PS5, Xbox One, Xbox Series X/S və Nintendo Switch platformalarında mövcuddur. Sentyabrın 29-da isə oyunun remaster versiyası Nintendo Switch 2 üçün satışa çıxarılacaq.
