“The Onion” şirkəti tərəfindən əldə edilən “InfoWars” platforması, 2 iyul tarixində yeni formatda fəaliyyətə başlayacaq. Əvvəllər Alex Jones tərəfindən idarə olunan və sui-qəsd nəzəriyyələri ilə tanınan şəbəkə, artıq komediya və mədəniyyət platforması kimi yenidən dizayn edilib. Layihə orijinal proqramlar, dəvət olunmuş istedadlar və yeni komediya simaları ilə izləyicilərin qarşısına çıxacaq.
Rəsmi açıqlamaya görə, bu təşəbbüs “Sandy Hook” ailələrinin dəstəyi ilə həyata keçirilir. Şirkət, layihə ilə bağlı məhsulların satışından əldə edilən 100 min ABŞ dolları məbləğində vəsaiti qurbanların ailələrinə ianə edib. Bu addım, 2022-ci ildə məhkəmə tərəfindən 1,5 milyard ABŞ dolları təzminat ödəməyə məhkum edilmiş Alex Jones-un yaratdığı zərərin kompensasiyası istiqamətində ilk addımlardan biri kimi qiymətləndirilir.
Yeni platformaya tanınmış komediya ustası Tim Heidecker rəhbərlik edəcək. “The Onion” artıq sosial şəbəkələrdə qondarma xəbər aparıcısı Jim Haggerty-nin sui-qəsd nəzəriyyələri ilə məşğul olan podkast aparıcısı kimi çıxış etdiyi qısa videolarla layihəni anons edib. “InfoWars” öz yayımına 2 iyul, saat 20:00-da (ET), theonion.info ünvanında və şirkətin sosial media kanallarında başlayacaq.
