31 avqust 2026-cı il tarixində "The Witcher 3" və "Cyberpunk 2077" oyunlarının aparıcı tərtibatçıları tərəfindən qurulan "Rebel Wolves" studiyasının hazırladığı "The Blood of Dawnwalker" layihəsi üçün ilk rəylər dərc olunub. "Bandai Namco" tərəfindən nəşr olunan oyun, "Metacritic" platformasında 83% ilə 88% arasında, "OpenCritic"də isə 84% reytinq toplayıb.
Oyunun süjeti XIV əsr Karpat dağlarında cərəyan edir və oyunçular Koen adlı yarı-vampir obrazını canlandırırlar. Baş qəhrəmanın əsas məqsədi 30 gün və gecə ərzində ailəsini Brensis adlı vampirin əlindən xilas etməkdir. Tənqidçilər oyunun atmosferini, hekayə dərinliyini və qərarların nəticələrini yüksək qiymətləndiriblər.
Oyunun hansı müsbət və mənfi tərəfləri var?
Mütəxəssislər oyunun narrativ strukturunu və maraqlı yan tapşırıqlarını tərifləsələr də, bir sıra texniki problemləri qeyd ediblər. Xüsusilə, vaxt məhdudiyyəti mexanikasının zəif icrası, boş açıq dünya, düşmən müxtəlifliyinin azlığı və optimizasiya problemləri oyunun əsas çatışmazlıqları kimi göstərilib. Döyüş sistemi isə tənqidçilər arasında birmənalı qarşılanmayıb.
"The Blood of Dawnwalker" rəsmi olaraq 3 sentyabr tarixində PC, "PS5", "Xbox Series X" və "S" platformaları üçün satışa çıxarılacaq. PC versiyasının qiyməti 4999 rus rublundan başlayır. Bir çox mütəxəssis oyunun əla debüt olduğunu, lakin tərtibatçıların bəzi cəsarətli ideyalarını tam reallaşdıra bilmədiyini vurğulayır.
