Rusiyada "WhatsApp" və "Telegram" messencerlərində zənglərin məhdudlaşdırılması istifadəçiləri yenidən ənənəvi mobil rabitəyə yönəldib. "MTS Link" şirkətinin bu ilin birinci rübündə apardığı araşdırmaya görə, adi telefon zənglərinin sayında altı dəfə artım qeydə alınıb. Sorğuda əhalisi 100 min nəfərdən çox olan şəhərlərdə yaşayan 2020 respondent iştirak edib.
Ənənəvi mobil zənglər hələ də əsas rabitə vasitəsi olaraq qalır. İştirakçıların 96 %-i bu üsuldan istifadə edir, onların 72 %-i isə hər gün zəng edir. Qatarda səyahət edənlərin 98 %-i də ənənəvi zənglərə üstünlük verir. Səsli mesajları ən çox səyahətçilər və məktəblilər göndərir. Məktəblilər arasında həmçinin video mesajların göndərilməsi də geniş yayılıb (83 %). İnternet üzərindən audio və video zənglərdən isə müvafiq olaraq respondentlərin 63 %-i və 56 %-i istifadə edir.
İstifadəçilər hansı tətbiqləri seçirlər?
Sorğu nəticələrinə əsasən, istifadəçilərin 34 %-i həftədə ən azı bir dəfə "Max" tətbiqi vasitəsilə zəng edir. "Telegram" istifadəçiləri üçün bu göstərici 31 % təşkil edir. "VKontakte" və "WhatsApp" platformalarından isə müvafiq olaraq 15 % və 13 % respondent istifadə edir. İnsanlar internet zəngləri üçün tətbiq seçərkən əsasən istifadə rahatlığına (58 %), ətrafdakılar arasında populyarlığına (53 %) və pula və ya trafikə qənaət edilməsinə (43 %) diqqət yetirirlər.
Platformaların üstünlükləri və çatışmazlıqları nələrdir?
"Telegram" əsasən ətrafdakılar arasında geniş yayıldığına və təhlükəsizliyə görə seçilir. Respondentlərin üçdə birindən çoxu bu messencerin məlumatların şifrələnməsi baxımından etibarlı olduğunu bildirib. "Max" tətbiqi isə zəif internet bağlantısı zamanı əlçatan olduğuna görə (38 %) istifadə edilsə də, istifadə rahatlığı və təhlükəsizlik (19 %) kimi göstəricilərdə rəqiblərindən geri qalır. Bu səbəbdən "Max" istifadəçiləri başqa platformaya keçməyə daha çox meyllidirlər.
Qrup zəngləri və əlavə funksiyalar üçün istifadəçilər "Yandex Telemost", "Zoom" və "Discord" platformalarına müraciət edirlər. Ümumilikdə, respondentlərin 82 %-i istifadə etdikləri zəng xidmətlərindən razıdır. Ən yüksək məmnuniyyət səviyyəsi "Discord" istifadəçiləri (94 %) arasında qeydə alınıb. Ən az məmnun olanlar isə "Max" (76 %) və "WhatsApp" (75 %) istifadəçiləridir.
