"Counterpoint Research" analitiklərinin məlumatına görə, virtual və artırılmış reallıq qarniturları ilə müqayisədə, ekranı olmayan ağıllı eynəklər bazarda daha böyük populyarlıq qazanıb. Cari ilin ilk yarısında süni intellekt (İİ) dəstəkli ağıllı eynəklərin tədarükü illik müqayisədə 263% artıb. Bu cihazların 96%-i ekranla təchiz olunmayıb, lakin İİ sorğularını avtonom şəkildə emal etmək qabiliyyətinə malikdir.
Bazarda kimlər liderlik edir?
Ekranı olmayan İİ eynəkləri bazarının 94%-nə "Meta" və "EssilorLuxottica" şirkətlərinin birgə əməkdaşlığı nəzarət edir. Bu alyans ötən yarım ildə tədarüklərini 260% artırıb. "Xiaomi" və "Alibaba" kimi digər oyunçular isə bazarda cəmi 1% paya sahibdirlər. Ekranlı eynəklər seqmentində isə Çin istehsalçıları, xüsusilə "Rokid" (41%), "Even Realities" (11%) və "Alibaba" (7%) daha uğurlu nəticələr göstərib.
Nə üçün bu cihazlar populyardır və hansı risklər var?
Ekranlı cihazlar ümumi bazarın cəmi 4%-ni təşkil edir. Onların geniş yayılmasına yüksək qiymət, texnoloji qeyri-kamillik və cihazların iri ölçüləri mane olur. Analitiklər qeyd edir ki, bazarın gələcək inkişafına komponentlərin, xüsusilə yaddaş çiplərinin bahalaşması və istifadəçilərin kameralı eynəklərlə bağlı məxfilik narahatlıqları təsir göstərə bilər. Gələcəkdə "Google", "Samsung" və "Apple" kimi texnologiya nəhənglərinin bu sahəyə daxil olması ilə rəqabətin daha da güclənəcəyi gözlənilir.
