"Unknown Worlds Entertainment" studiyası tərəfindən hazırlanan və "Krafton" şirkətinə məxsus olan populyar sualtı sağ qalma simulyatoru Subnautica 2 üçün ilk irimiqyaslı yenilənmə istifadəyə verilib. 1.1 versiyası ilə birlikdə oyuna həm oyunçu təcrübəsini artıran, həm də süni intellekt davranışlarını tənzimləyən mühüm dəyişikliklər əlavə olunub.
Oyun mexanikasında hansı yeniliklər var?
Yenilənmənin ən diqqətçəkən məqamı məxluqların davranış sisteminin yenilənməsidir. Artıq yırtıcılar oyunçuya yalnız özünümüdafiə məqsədilə və məhdud müddət ərzində hücum edirlər. Bundan əlavə, səs rezonatoru ilə zərbə endirmək yırtıcıları müvəqqəti olaraq huşsuz vəziyyətə salır, bu da oyunçulara daha strateji müdafiə qurmağa imkan verir.
Texniki tərəfdə isə oyunçuların uzun müddətdir gözlədiyi sprint (sürətli qaçış) düyməsi əlavə olunub; bu funksiya həm su altında, həm quruda, həm də bazada aktivdir. Həmçinin, biomodifikasiya sistemi genişləndirilərək iki yeni biolaboratoriya və altı yeni modifikasiya imkanı təqdim edilib. Bazaların ölçülərinin artırılması və əlavə saxlama sahələrinin yaradılması kimi funksiyalar da oyunun idarəetməsini daha rahat hala gətirir.
Performans və gələcək planlar
1.1 yaması ilə yanaşı, oyunun performans və sabitlik göstəriciləri də əhəmiyyətli dərəcədə yaxşılaşdırılıb. Xüsusilə, xilasetmə kapsulu ilə hərəkət zamanı yaranan texniki problemlər aradan qaldırılıb və yaddaşda saxlama sistemi optimallaşdırılıb. 14 may tarixində erkən girişə açılan Subnautica 2, Steam platformasında 91% müsbət rəy alaraq, cəmi beş gün ərzində 4 milyon nüsxə satışı ilə böyük uğur qazanıb. Gələcək həftələrdə kooperativ oyun rejiminə fokuslanan 1.2 yenilənməsinin buraxılması planlaşdırılır.
