"SteamDB"-nin həmtəsisçisi Pavel Cundik, daha çox xPaw ləqəbi ilə tanınan proqramçı, 13 illik fəaliyyətdən sonra layihəni yeni sahibinə təhvil verdiyini açıqlayıb. "Valve" şirkətinin rəqəmsal mağazası olan "Steam"-in daxili proseslərinə maraqdan doğan bu layihə, zamanla sadə bir hobbidən genişmiqyaslı bir xidmətə çevrilmişdi.
Pavel Cundik layihəni tərk etməsinin əsas səbəblərini izah edərkən internetin keçmişdəki ruhunu itirməsinə diqqət çəkib. O, xüsusilə COVID-19 pandemiyasından sonra süni intellekt texnologiyalarının sürətli inkişafının internet mühitini dəyişdiyini və bu vəziyyətin onda ciddi peşəkar tükənməyə səbəb olduğunu bildirib.
"SteamDB" gələcəkdə necə fəaliyyət göstərəcək?
Layihənin yeni sahibi olan Nexus Mods komandası "SteamDB"-nin özünəməxsus xüsusiyyətlərinin qorunub saxlanılacağını bəyan edib. Satınalmanın əsas məqsədi layihəyə uzunmüddətli sabitlik və inkişaf üçün zəruri olan resursları təmin etməkdir. Cundik-in təkbaşına öhdəsindən gələ bilmədiyi bu texniki dəstək artıq Nexus Mods tərəfindən təmin olunacaq.
Gələcəkdə bu əməkdaşlıq Nexus Mods platformasının təkmilləşdirilməsinə də töhfə verəcək. Xüsusilə, oyun yeniləmələrindən sonra modların işlək vəziyyətdə qalması üçün oyun versiyalarının avtomatik tanınması prosesinin optimallaşdırılması planlaşdırılır. SteamDB uzun illərdir ki, oyunçular üçün endirim təqvimləri və onlayn statistika kimi vacib məlumatları təqdim edən əvəzsiz bir resurs olaraq qalır.
