"Bloomberg" jurnalisti Jason Schreier-in verdiyi məlumata görə, "PlayStation" artıq özünün əsas təkoyunçulu (single-player) oyunlarını "PC" platforması üçün təqdim etməyəcək. "PlayStation" studiyalarının rəhbəri Hermen Hulst bazar ertəsi keçirilən daxili yığıncaqda işçiləri bu yeni strategiya barədə məlumatlandırıb. Schreier hələ mart ayında "Sony" şirkətinin "Ghost of Yōtei" və digər daxili layihələrin "PC" versiyalarını ləğv etdiyini bildirmişdi.
Yeni qərar yalnız hekayə əsaslı oyunlara şamil edilir. Belə ki, onlayn və çoxoyunçulu (multiplayer) layihələr əvvəlki qaydada müxtəlif platformalarda yayımlanmağa davam edəcək. Xatırladaq ki, son illərdə "Sony" şirkəti "Spider-Man 2", "Ghost of Tsushima", "The Last of Us" seriyası və "Horizon Zero Dawn Remastered" kimi böyük oyunlarını kompüterlər üçün də buraxmışdı. İki il əvvəl Hermen Hulst canlı xidmət (live service) oyunlarının eyni gündə həm "PS5", həm də "PC" üçün çıxacağına söz versə də, təkoyunçulu layihələr üçün daha "strateji yanaşma" tətbiq etdiklərini vurğulamışdı.
Eksklüzivlik siyasətinə qayıdan yeganə şirkət "Sony" olmaya bilər. "Microsoft" şirkətinin yeni "Xbox" rəhbəri Asha Sharma da işçilərinə platforma üçün eksklüziv oyunlar məsələsini "yenidən qiymətləndirdiyini" bildirib. Görünür, hər iki nəhəng korporasiya öz konsollarının rəqabət qabiliyyətini qorumaq üçün eksklüziv məzmunlara yenidən üstünlük verməyi planlaşdırır.
