"Sony Music" və "Warner Chappell" şirkətləri ABŞ-ın Kaliforniya ştatının Şimali dairə məhkəməsində "Anthropic"-ə qarşı iddia qaldırıb. İddiaçılar şirkəti on minlərlə müəllif hüququ ilə qorunan əsərdən icazəsiz istifadə etməkdə günahlandırır. Tələb olunan təzminatın həcmi hər bir əsər üçün 150 min ABŞ dolları, həmçinin müəllif hüququ məlumatlarının silindiyi hər bir hal üçün 25 min ABŞ dolları təşkil edir. Məhkəmə iddianı təmin edəcəyi təqdirdə, ümumi cərimə məbləği milyardlarla dollara çata bilər.
İddianın detalları nədən ibarətdir?
Məhkəmə sənədində təkcə "Anthropic" şirkəti deyil, onun həmtəsisçiləri Dario Amodei və Benjamin Mann da cavabdeh qismində göstərilib. İddiaya görə, Benjamin Mann BitTorrent vasitəsilə 5 milyondan çox pirat kitab yükləyib, şirkət əməkdaşları isə "Pirate Library Mirror" vasitəsilə daha 2 milyon fayl əldə ediblər. Bundan əlavə, şirkətin "MusixMatch" və "LyricFind" kimi platformalardan mahnı sözlərini qanunsuz yollarla topladığı iddia edilir.
Hansı mahnılar mübahisə obyektidir?
Məhkəmə sənədlərində "Anthropic"-in "Claude" süni intellekt modellərinin təlim məlumatlarında istifadə edildiyi iddia olunan bir sıra məşhur mahnıların adları qeyd olunub. Bunların arasında Marvin Gaye və Tammi Terrell-in "Ain’t No Mountain High Enough", Bon Jovi-nin "Livin’ On a Prayer", Earth, Wind & Fire-ın "September", Leonard Cohen-in "Hallelujah" və Taylor Swift-in "Paper Rings" əsərləri yer alır. Şirkət hələlik bu ittihamlarla bağlı rəsmi açıqlama verməyib.
