"Snap" şirkətinin baş icraçı direktoru Evan Şpigel tərəfindən işçilərə göndərilən xidməti məktuba əsasən, texnologiya nəhəngi xərclərin azaldılması istiqamətində ciddi addımlar atır. Şirkət qlobal işçi qüvvəsinin 16 faizini, yəni təxminən 1000 nəfər tam ştatlı əməkdaşını ixtisar edir. Bununla yanaşı, əvvəlcədən planlaşdırılan 300 açıq vakansiya da ləğv olunub. Bu addım gəlirliliyi bərpa etmək və süni intellektin imkanlarından daha geniş istifadə etmək məqsədi daşıyır.
2025-ci ilin dekabr ayına olan məlumata görə, "Snap" şirkətinin 5261 tam ştatlı işçisi var idi. Gözlənilir ki, həyata keçirilən bu ixtisarlar 2026-cı ilin ikinci yarısınadək şirkətə 500 milyon ABŞ dolları məbləğində vəsaitə qənaət etməyə imkan verəcək. Beləliklə, "Snap" da bu il kütləvi ixtisarlar elan edən "Meta", "Amazon", "Oracle", "GoPro" və Cek Dorsinin rəhbərlik etdiyi "Block" kimi texnologiya şirkətlərinin siyahısına qoşulub.
Şirkət rəhbərliyi hesab edir ki, süni intellekt sahəsindəki sürətli irəliləyişlər komandalara təkrarlanan işləri azaltmağa və sürəti artırmağa kömək edəcək.
"Bu dəyişikliklər 'Snap'ın uzunmüddətli potensialını reallaşdırmaq üçün zəruri olsa da, inanırıq ki, süni intellekt icmamızı, tərəfdaşlarımızı və reklamverənlərimizi daha yaxşı dəstəkləməyə imkan yaradır,"- deyə Evan Şpigel qeyd edib. O, həmçinin kiçik qrupların artıq süni intellekt alətlərindən istifadə edərək "Snapchat+" və reklam platformasının səmərəliliyinin artırılması kimi vacib təşəbbüslərdə əhəmiyyətli irəliləyişlər əldə etdiyini vurğulayıb.
İxtisara düşən ABŞ əsaslı işçilərə dörd aylıq işdənçıxma müavinəti, səhiyyə sığortası və karyera keçidi dəstəyi təqdim ediləcək. Digər ölkələrdəki əməkdaşlar üçün isə yerli qanunvericiliyə uyğun olaraq müvafiq dəstək tədbirləri görüləcək. Şpigel ötən payızda şirkətin həlledici bir mərhələ ilə üzləşdiyini və daha sürətli, səmərəli iş rejiminə ehtiyac olduğunu xatırladaraq, bu qərarın uzunmüddətli dəyər yaratmaq üçün verildiyini bildirib.
