Müasir şəhər mühitində aktiv səsboğucu (ANC) texnologiyalı qulaqlıqlardan istifadə edən piyadalar ətraf aləmdən təcrid olunduqları üçün təhlükə ilə üzləşirlər. Bu problemi həll etmək məqsədilə "Skoda" şirkəti Solford Universitetinin (Böyük Britaniya) alimləri ilə əməkdaşlıq edərək "DuoBell" adlı yeni mexaniki velosiped zəngi ərsəyə gətirib.
Tərtibatçıların sözlərinə görə, onlar zəngin səsini sadəcə ucadan etmək əvəzinə, müasir qulaqlıqların səsboğma sistemlərinin zəif nöqtəsini tapıblar. "Skoda" tərəfindən aparılan tədqiqatlar göstərib ki, aktiv səsboğucu sistemlər 750-780 Hz tezlik diapazonunda ən aşağı effektivliyə malikdir. Məhz bu səbəbdən "DuoBell" zəngi həmin tezlik aralığına uyğunlaşdırılıb. Cihazın konstruksiyasına əlavə edilmiş rezonator səs siqnalının eşidilmə qabiliyyətini artırır. Zəngin metal gövdəsinə vuran mexanizm sürətli və qeyri-ritmik zərbələr endirir ki, bu səslər müasir "TWS" qulaqlıqlarının alqoritmləri tərəfindən boğula bilmir.
Şəhər mühitində aparılan sınaqlar göstərib ki, bu unikal velosiped zəngi qulaqlıq taxan piyadaların diqqətini hətta 22 metr məsafədən belə cəlb edə bilir. Nəticədə, piyadanın velosipedçinin hansı istiqamətdən yaxınlaşdığını anlamaq üçün əlavə beş saniyə vaxtı olur. "Skoda" bu texnologiya ilə bağlı tədqiqat sənədlərini ictimaiyyətə açıq şəkildə təqdim edib.
