Niderland hüquq-mühafizə orqanları 15 sentyabr tarixində Amsterdam şəhərində 24 yaşlı bir şəxsi saxlayıb. Həmin şəxs qlobal miqyasda böyük rezonans doğuran kiberhücumları ilə tanınan "ShinyHunters" haker qruplaşması ilə əlaqədə şübhəli bilinir. Qrup daha əvvəl "Ticketmaster", "Rockstar Games" və son olaraq "FBI"-ın veb-saytına hücum edərək məlumat oğurluğu həyata keçirməkdə ittiham olunur.
Rəsmi məlumatlara görə, saxlanılan şəxsin adı açıqlanmasa da, "Krebs on Security" və "Reuters" onun 2023-cü ildə məlumat oğurluğu və şantaj ittihamı ilə mühakimə olunmuş Pepijn van der Stap olduğunu bildirir. Maraqlıdır ki, həbsdən çıxdıqdan sonra o, "Neo Security" adlı kibertəhlükəsizlik şirkətində fəaliyyət göstərib. "ShinyHunters" qrupu isə Van der Stap ilə heç bir əlaqələrinin olmadığını iddia edir.
İstintaq və hüquq-mühafizə orqanlarının mövqeyi
"FBI"-ın Kibertəhlükəsizlik şöbəsinin direktor müavini Brett Leatherman saxlanılan şəxsi qrupun liderlərindən biri kimi xarakterizə edib. O, digər hakerlərə xəbərdarlıq edərək, hüquq-mühafizə orqanlarının onları izlədiyini və könüllü təslim olmağın daha yaxşı nəticələnəcəyini vurğulayıb. "FBI" direktoru Kash Patel isə "X" sosial şəbəkəsindəki paylaşımında istintaqın davam etdiyini və yeni sübutlar əldə etmək üçün beynəlxalq tərəfdaşlarla sıx əməkdaşlıq etdiklərini bildirib.
Həbs olunan şəxsə qarşı irəli sürülən ittihamlar yalnız kiberhücumlarla məhdudlaşmır. Niderland polisi onu həm də iki nəfərin qətlə yetirilməsinə cəhd etməyə təhrik etməkdə şübhəli bilir. Hazırda hüquq-mühafizə orqanları tərəfindən genişmiqyaslı araşdırmalar davam etdirilir.
