"Denuvo Software Solutions" şirkətinin "DMCA" (Rəqəmsal Minilliyin Müəllif Hüquqları Aktı) əsasında ABŞ federal məhkəməsində qaldırdığı iddia "voices38" ləqəbli hakeri dayandıra bilməyib. Bir aylıq sükutdan sonra haker "Rebellion Developments" studiyasının "Atomfall" oyunu ilə yanaşı, "Square Enix" tərəfindən hazırlanan "The Adventures of Elliot: The Millennium Tales" oyununu da sındırıb. Bundan əlavə, o, "Electronic Arts" və "Motive Studio" tərəfindən hazırlanan "Dead Space" remeyki üçün yenilənmiş "crack" versiyasını təqdim edib.
Məhkəmə prosesi və hakerin kimliyi
Sentyabrın ortalarında "Denuvo" şirkəti 26 oyunda müdafiə sistemini qanunsuz şəkildə keçdiyi üçün hakerə qarşı hüquqi mübarizəyə başlayıb. Hakerin şəxsiyyəti məlum olmadığı üçün cərimələrin tətbiqi çətinləşir. Şirkət hazırda "Discord", "Reddit" və "Steam" platformalarından hakerin kimliyini müəyyən etmək üçün məlumat tələb edib.
Pirata qarşı mübarizənin nəticələri
Məhkəmə prosesi hakerin fəaliyyətinə birbaşa təsir göstərməsə də, digər qruplara təsir edib. Məhkəmə ilə bağlı yaranan təhlükəsizlik narahatlıqları fonunda "DenuvOwO" adlı pirat qruplaşması fəaliyyətini dayandıraraq dağılıb. "Denuvo" şirkətinin bu hüquqi addımlarının gələcəkdə piratçılığa qarşı nə dərəcədə effektiv olacağı hələlik sual altındadır.
