Cənubi Koreya texnologiya nəhəngi "Samsung", "Galaxy S26 Ultra" modellərində ekranın mərkəzində yaranan qırmızımtıl rəng problemi ilə bağlı rəsmi açıqlama verib. Şirkət istifadəçilərə göndərdiyi bildirişdə problemin aparat nasazlığı olmadığını və proqram təminatı vasitəsilə aradan qaldırıla biləcəyini vurğulayıb.
Hazırda istifadəçilər problemi həll etmək üçün yerli "Samsung" servis mərkəzlərinə müraciət edə bilərlər. Servis mərkəzlərində həyata keçirilən proqram kalibrləməsi tamamilə pulsuzdur və cihazın zəmanət müddətindən asılı olmayaraq bütün istifadəçilərə təqdim olunur. Şirkət bu prosedurun müraciət edildiyi gün icra olunacağını bildirib.
Uzaqdan yenilənmə nə vaxt olacaq?
Servis mərkəzinə getmək istəməyən müştərilər üçün "Samsung Electronics" uzaqdan tətbiq ediləcək proqram təminatı yeniləməsi üzərində işləyir. Yeniləmənin dəqiq buraxılış tarixi hələlik açıqlanmasa da, şirkət hazır olan kimi ətraflı məlumat verəcəyini vəd edib. Bu həll yolu istifadəçiləri smartfonu servisə təhvil vermək məcburiyyətindən xilas edəcək.
Daha əvvəl yayılan məlumatlarda problemin ekranın yüksək parlaqlıq səviyyəsində işləyərkən parlaq işığa məruz qalması nəticəsində yarana biləcəyi ehtimal edilirdi. Bununla belə, son rəsmi açıqlamada konkret səbəb göstərilməyib. "Galaxy S26 Ultra" sahibləri üçün ən sevindirici məqam isə problemin cihazın kütləvi geri çağırılmasını tələb etməməsidir.
