"Samsung" şirkəti tərəfindən rəsmən elan edilən "Galaxy A27" smartfonu, sələfi olan "Galaxy A26" ilə müqayisədə 50 ABŞ dolları baha qiymətə - 349,99 ABŞ dollarına satışa çıxarılır. İqtisadi şərait fonunda qiymət artımı müşahidə olunsa da, cihazın bəzi texniki xüsusiyyətlərinin aşağı salınması istifadəçilər üçün düşündürücüdür.
Yeni modeldə 12 meqapiksellik ön kamera və 5 meqapiksellik ultra geniş bucaqlı kamera istifadə edilib ki, bu da əvvəlki versiyadan daha aşağı göstəricidir. Bundan əlavə, IP64 standartlı suya davamlılıq səviyyəsi zəifləyib və cihazın qalınlığı 7,8 mm-ə çataraq bir qədər artıb. 6 GB RAM, 128 GB yaddaş, 5000 mAh batareya, 6,7 düymlük 120 Hz ekran və 50 meqapiksellik əsas kamera kimi göstəricilər isə dəyişməz qalıb.
Yeganə nəzərəçarpacaq irəliləyiş isə prosessor hissəsində baş verib. "Samsung" bu modeldə "Exynos 1380" çipsetini "Qualcomm" şirkətinin "Snapdragon 6 Gen 3" prosessoru ilə əvəzləyib. "Galaxy A27" ABŞ bazarında 14 iyul tarixindən etibarən yalnız qara rəngdə satışa çıxarılacaq, beynəlxalq bazarlarda isə 3 iyul tarixindən mavi və çəhrayı rəng seçimləri ilə əlçatan olacaq.
