“Riot Games” şirkətinin anti-fırıldaq şöbəsinin rəhbəri Phillip Koskinas tərəfindən verilən məlumata görə, “Vanguard” sistemi artıq həmişə aktiv rejimdən “tələb əsasında” işləyən rejimə keçirilə bilər. Bu yenilik, “Microsoft”un Xbox OS Security Team komandası ilə əməkdaşlıq çərçivəsində hazırlanan və Windows nüvəsindəki boşluqları bağlayan təkmilləşdirmələr sayəsində mümkün olub. Yeni “Vanguard Pre-Check” funksiyası sayəsində sistemin nüvə səviyyəsindəki drayveri kompüter işə düşən zaman deyil, yalnız oyun başladıldıqda aktivləşir.
Bu funksiyadan necə istifadə etmək olar?
Bu imkandan yararlanmaq üçün istifadəçilərin Windows 11 25H2 və ya daha yeni versiyada olması tələb olunur. Hazırda oyunçuların təxminən 35 faizi bu tələblərə artıq cavab verir və onlar növbəti yeniləmədən sonra avtomatik olaraq bu funksiyanı aktivləşdirə biləcəklər. Digər 65 faiz istifadəçi isə “tələb əsasında” rejimə keçmək üçün UEFI Mode, Secure Boot, TPM 2.0, VBS, HVCI və IOMMU kimi təhlükəsizlik parametrlərini aktivləşdirməlidir.
Phillip Koskinas vurğulayır ki, bu dəyişiklik məcburi deyil və yalnız istəyə bağlıdır. Yeni nəsil kompüterlərin əksəriyyəti bu parametrlərlə təchiz olunduğu üçün, bir çox istifadəçi üçün proses olduqca sadə olacaq. Əgər istifadəçi bu parametrləri dəyişmək istəmirsə, “Vanguard” əvvəlki qaydada, yəni sistem işə düşdüyü andan etibarən aktiv qalmağa davam edəcək.
