“Riot Games” studiyası “2XKO” adlı pulsuz döyüş oyununun inkişaf prosesinə son qoymağa hazırlaşır. Şirkətin rəsmi açıqlamasına görə, oyunun davamlı inkişafı üçün kifayət qədər istifadəçi bazası formalaşmayıb və layihə iqtisadi cəhətdən dayanıqlı deyil. 2026-cı ilin sonuna qədər aktiv işlər yekunlaşdırılsa da, oyunun serverləri bu tarixdən sonra da aktiv qalacaq.
Layihənin bağlanması ilə bağlı şirkət istifadəçilərə dəstək göstərməyi planlaşdırır. Belə ki, oyundakı bütün personajlar pulsuz olaraq açılacaq və istifadəçilərin oyun daxilində xərclədikləri vəsaitlər geri qaytarılacaq. 2025-ci ilin oktyabrında “PC” platformasında, daha sonra isə PS5 və Xbox Series X / S konsollarında istifadəyə verilən oyun, gözlənilən uzunmüddətli uğuru əldə edə bilməyib.
Nə üçün “2XKO” layihəsi dayandırılır?
“Riot Games” qeyd edir ki, oyunun buraxılışından sonra keçirilən tədbirlər və yeni personaj yeniləmələri oyunçu sayında ciddi və davamlı artıma səbəb olmayıb. Şirkət rəsmiləri bildirib ki, oyunun idarəetmə xərcləri gəlirləri üstələyir və yeniləmələrə baxmayaraq, istifadəçi aktivliyi aşağı səviyyədə qalıb. Bu vəziyyət layihənin mövcud komanda ilə davam etdirilməsini qeyri-mümkün edib.
Bu qərar oyun sənayesində “live service” (canlı xidmət) modelinə əsaslanan layihələrin üzləşdiyi çətinliklərin növbəti nümunəsidir. Daha əvvəl Sony, Remedy və Epic Games kimi nəhənglər də oxşar problemlərlə qarşılaşaraq öz layihələrində dəyişikliklər etmək və ya ixtisarlara getmək məcburiyyətində qalıblar.
