"Microsoft" şirkəti qlobal RAM çatışmazlığı səbəbindən "Surface" cihazlarının qiymətlərini artırıb. "Windows Central" nəşrinin məlumatına görə, 13 düymlük "Surface Pro 11" və 13,8 düymlük "Surface Laptop 7" modellərinin başlanğıc qiyməti 500 ABŞ dolları artaraq 999 ABŞ dollarından 1.499 ABŞ dollarına yüksəlib.
Keçən il texnologiya nəhəngi daha çox yaddaşa malik 1.199 ABŞ dolları dəyərindəki modellərə üstünlük verərək ucuz versiyaların satışını dayandırmışdı. Lakin qiymət artımı ötən ilin may ayında təqdim edilən daha uyğun qiymətli cihazlardan da yan keçməyib. Belə ki, 12 düymlük "Surface Pro" modelinin qiyməti 799 ABŞ dollarından 1.049 ABŞ dollarına, 13 düymlük "Surface Laptop" isə 899 ABŞ dollarından 1.199 ABŞ dollarına qədər bahalaşıb.
Hazırda 15 düymlük "Surface Laptop" 2024-cü ildəki 1.299 ABŞ dolları olan başlanğıc qiymətini geridə qoyaraq 1.599 ABŞ dollarına satılır. "Snapdragon X Elite" prosessoru, 64 GB RAM və 1 TB yaddaşla təchiz edilmiş ən üst versiya isə 3.649 ABŞ dollarına təklif edilir. Bu qiymət artımları "Microsoft" cihazlarını rəqib "Windows" noutbuklarını üstələyən 599 ABŞ dolları dəyərindəki "Apple" istehsalı "MacBook Neo" qarşısında daha çətin vəziyyətə salır.
Mənbələrin bildirdiyinə görə, "Microsoft" bu yaz və ya yay aylarında yeni "Surface" cihazlarını təqdim edə bilər. Bu isə o deməkdir ki, seriyaya əlavə olunacaq yeni modellər mövcud cihazlar qədər və ya onlardan daha baha ola bilər.
