"PlayStation Plus" xidmətinin sentyabr ayı üçün nəzərdə tutulan oyun siyahısı rəsmi anonsdan öncə məlum olub. Fransanın "Dealabs" portalının etibarlı insayderi billbil-kun tərəfindən paylaşılan məlumatlara əsasən, abunəçiləri bu dəfə üç fərqli oyun gözləyir.
Siyahının əsas oyununun Rebellion Developments tərəfindən hazırlanan "Sniper Elite: Resistance" olacağı bildirilir. Digər iki oyun isə "Chained Echoes" adlı piksel qrafikalı rol oyunu və dörd nəfərlik kooperativ rejimi ilə seçilən "Wobbly Life" qum qutusu (sandbox) oyunudur. "Wobbly Life" layihəsi "Steam" platformasında 97% müsbət rəy göstəricisinə sahib olsa da, ümumi siyahı istifadəçilər arasında birmənalı qarşılanmayıb.
İstifadəçilər niyə narazıdır?
billbil-kun-un paylaşımına gələn şərhlərdən aydın olur ki, abunəçilərin çoxu təqdim olunan oyunlardan məyus olub. Buna baxmayaraq, bəzi oyunçular "Chained Echoes"-un siyahıya daxil edilməsini müsbət qiymətləndiriblər. Rəsmi elanın 26 avqust tarixində, Bakı vaxtı ilə saat 19:30-da ediləcəyi gözlənilir.
Qeyd edək ki, bu oyunlar 1 sentyabr tarixindən 6 oktyabr 2026-cı ilədək aktiv olacaq. Oyunları "PlayStation Plus"-un "Essential", "Extra" və "Premium" (bəzi regionlarda "Deluxe") planlarına sahib olan bütün abunəçilər öz kitabxanalarına əlavə edə biləcəklər.
