Kanadanın "Ploopy" şirkəti taçpad və trekbollardan köklü şəkildə fərqlənən yeni açıq mənbəli siçan alternativini anons edib. "Ploopy Bean" adlanan bu yeni cihaz səyahət üçün nəzərdə tutulmuş miniatür siçana bənzəsə də, istifadə zamanı onu yerindən tərpətməyə ehtiyac qalmır. Qurğunun mərkəzində, hələ "Lenovo" brendi almazdan çox əvvəl "IBM" tərəfindən "ThinkPad" noutbuklarında istifadə edilən "TrackPoint" bənzəri kiçik qırmızı coystik yerləşir və o, dörd düymə ilə əhatə olunub.
3D printerdə çap edilmiş düzbucaqlı gövdənin daxilində 3 mikrondan başlayan hərəkətləri belə aşkar edə bilən yüksək həssaslıqlı "Texas Instruments" maqnit sensoru quraşdırılıb. Coystik özü noutbuk klaviaturalarında istifadə olunan analoqları ilə müqayisədə daha geniş fiziki hərəkət diapazonu təqdim edir. Cihazın çəkisi cəmi 52 qram, ölçüləri isə 8,4 × 6,4 × 1,6 sm təşkil edir. "Bean" modelinin dörd düyməsi bir çox "Logitech" siçanlarında da rast gəlinən "Omron D2LS-21" açarlarından istifadə edir.
Düymələr "Ploopy" tərəfindən əvvəlcədən quraşdırılmış "QMK" proqram təminatı sayəsində tam fərdiləşdirilə bilir. "VIA" onlayn alətinin köməyi ilə istifadəçilər bir toxunuşla makrosları və ya klaviatura kombinasiyalarını işə salmaq üçün düymələri proqramlaşdıra bilərlər. Cihazın yeganə çatışmazlığı simsiz protokolları dəstəkləməməsidir, buna görə də noutbuk və ya planşetə qoşulmaq üçün "USB Type-C" kabeli tələb olunur. Hazırda "Ploopy Bean" manipulyatorunu şirkətin rəsmi saytında 69,99 Kanada dolları (təxminən 51 ABŞ dolları) qiymətinə əvvəlcədən sifariş etmək mümkündür.
