Cümə günü keçirilən maliyyə hesabatı təqdimatında "Sony" şirkəti "PlayStation" oyunlarının yaradılmasında süni intellektdən (Sİ) necə istifadə etdiyini açıqlayıb. Şirkət nümayəndələri süni intellekti "güclü alət" adlandırsalar da, oyunların "baxışı, dizaynı və emosional təsirinin həmişə studiyaların və aktyorların istedadından qaynaqlanacağını" bildiriblər. Rəsmi açıqlamaya görə, yeni texnologiya insanları əvəz etmək üçün deyil, onların imkanlarını genişləndirmək üçün nəzərdə tutulub.
Hazırda "Sony" studiyalarında təkrarlanan iş prosesləri avtomatlaşdırılır, proqram təminatı mühəndisliyinin məhsuldarlığı artırılır və keyfiyyətə nəzarət, 3D modelləşdirmə kimi sahələr süni intellekt vasitəsilə sürətləndirilir. Bunun ən bariz nümunəsi hərəkət tutma məlumatlarından istifadə edərək 3D üz modellərini canlandıran "Mockingbird" alətidir. Bu sistem əvvəllər saatlar çəkən animasiya işini "saniyənin kiçik bir hissəsində" tamamlamaq qabiliyyətinə malikdir.
"Mockingbird" alətindən artıq "Naughty Dog" və "Santa Monica Studio" kimi məşhur inkişaf etdiricilər istifadə edib. Hətta bu texnologiyanın nəticələri "Horizon Zero Dawn Remastered" oyununda da öz əksini tapıb. Bundan əlavə, "Sony" video istehsalında generativ süni intellektin imkanlarını araşdırmaq üçün "Bandai Namco" ilə tərəfdaşlıq qurduğunu elan edib. Şirkətlər bu əməkdaşlıq sayəsində sürət və məhsuldarlıqda böyük artım müşahidə etsələr də, generativ modellərin "ardıcıllıq və idarəetmə çatışmazlığını" əsas zəiflik kimi qeyd ediblər.
Maliyyə hesabatının digər diqqətçəkən məqamı isə konsol satışları ilə bağlı olub. "Sony" tərəfindən verilən məlumata görə, qiymətlərin əhəmiyyətli dərəcədə artırılmasından sonra "PS5" satışları illik müqayisədə 46 faiz azalıb.
