"DoesItPlay" icması tərəfindən başladılan #PSBlackout aksiyası çərçivəsində oyunçulara bir həftə ərzində "PlayStation" konsollarını işə salmamaq və "PlayStation Network" hesablarından çıxış etmək çağırışı edilib. İştirakçılardan sistemə daxil olmamaq, oyun seansları keçirməmək və "Sony" platformalarında heç bir alış-veriş etməmək tələb olunur. Bu addım şirkətin fiziki daşıyıcılardan imtina edərək tamamilə rəqəmsal oyun satışına keçməsinə qarşı narazılıqdan qaynaqlanır.
Bu boykot aksiyası nəticə verəcəkmi?
Ekspertlərin fikrincə, avqustun son həftəsinin sakit dövr olması və "Gamescom" kimi böyük tədbirlərin keçirilməsi səbəbindən bu boykotun "Sony"-yə ciddi təsir göstərməsi ehtimalı aşağıdır. Bir çox istifadəçi aksiyanın səmərəsiz olduğunu düşünərək, "PSN" abunəliklərinin kütləvi şəkildə ləğvi və ya rəqəmsal ön sifarişlərin geri qaytarılması kimi daha radikal tədbirlərin görülməsini təklif edir. Sosial şəbəkələrdəki müzakirələrdə istifadəçilər "Sony"-nin bu etirazlara məhəl qoymayacağını və sadəcə gözləmə mövqeyi tutacağını vurğulayırlar.
Rəqəmsal oyun bazarında mülkiyyət hüququ problemi
Oyun sənayesinin "Steam" və "Epic Games" kimi platformaların təsiri ilə fiziki disklərdən uzaqlaşması istifadəçilər arasında ciddi narahatlıq doğurur. Əksər rəqəmsal mağazalarda oyunun "alınması" əslində ona sahib olmaq demək deyil, sadəcə istifadə hüququnun əldə edilməsidir. Hazırda oyunçulara tam mülkiyyət hüququ verən yeganə böyük distribütor "GOG" olaraq qalır. Bu tendensiya fonunda bəzi hakerlər, məsələn "Cyberleek", rəqəmsal siyasətə qarşı öz etirazlarını məlumat sızdırmaları və qeyri-qanuni paylaşımlarla nümayiş etdirməyə çalışırlar.
