"Panasonic" şirkəti "Lumix" seriyasına daxil olan yeni kompakt kamerasını elan edib. Əsasən fotoqraflar üçün nəzərdə tutulan "Lumix L10" modelinin qara və gümüşü rəng variantları 1 499,99 ABŞ dolları qiymətinə əvvəlcədən sifarişə çıxarılıb. "Lumix" brendinin 25 illik yubileyi münasibətilə cihazın məhdud sayda titan qızılı rəngli xüsusi versiyası da təklif olunur. Bu versiya uyğun aksesuarlar və proqram təminatı ilə birlikdə 1 599,99 ABŞ dolları müqabilində əsasən şirkətin onlayn mağazasında satılacaq.
Çəkisi 508 qram olan yeni qadcet maqnezium ərintisindən hazırlanmış ön korpusa malikdir. Cihazın xarici səthi retro üslubunda dizayn edilib və qismən saffiano dərisini xatırladan tekstura ilə örtülüb. Kameranın daxilində "Lumix GH7" modelində də istifadə olunan 20,4 meqapiksellik arxadan işıqlandırmalı CMOS sensor yerləşir. Baxmayaraq ki, "GH7" video çəkilişlər üçün güclü vasitədir, yeni modelin əsas təyinatı fərqlidir. Cihaz 120 fps sürətində 4K videolar çəkə bilsə də, kompakt ölçüsü istilik yayma qabiliyyətini məhdudlaşdırır və bu da qeyd müddətinə təsir göstərir.
Kamera f/1.7 - f/2.8 diafraqma aralığına malik 24-75 mm-lik "Leica" obyekti ilə təchiz edilib. Makro çəkiliş imkanları sayəsində avtofokus obyekti 3 sm məsafədən belə dəqiqliklə tuta bilir. Cihazın faza hibrid fokus sistemi kadr boyu paylanmış 779 avtofokus nöqtəsindən istifadə edir. Süni intellektə əsaslanan real vaxt rejimində tanıma sistemi gözləri, üzləri, bədənləri, heyvanları və ya nəqliyyat vasitələrini izləmək qabiliyyətinə malikdir. Yüksək sürətli çəkiliş elektron çekim ilə 30 fps, mexaniki çekim ilə isə 11 fps təşkil edir.
Kameranın arxa hissəsində 1,84 milyon nöqtəli hərəkətli ekran və 2,36 milyon nöqtəli OLED vizör yerləşdirilib. Bundan əlavə, istifadəçilər müxtəlif rəng effektləri və simulyasiya edilmiş film üslublarını tətbiq etmək üçün xüsusi düymədən yararlana bilərlər. Bu effektləri "Lumix Lab" mobil tətbiqi vasitəsilə fərdiləşdirmək və birbaşa kameraya yükləmək mümkündür.
