“Fulqrum Publishing” (keçmiş 1C Publishing) şirkəti yerli oyun sənayesinin klassik nümunələrini rəqəmsal unudulmaqdan xilas etmək missiyasını davam etdirir. Bu dəfə növbə SkyFallen Entertainment studiyası tərəfindən hazırlanan və 2005-ci ilin qışında “Diablo”nun rusiyalı rəqibi kimi təqdim edilən “Магия крови” (xaricdə “Dawn of Magic”) oyununa çatıb. Oyun artıq “Steam” platformasında istifadəçilərin ixtiyarına verilib.
Oyunun yenilənmiş versiyasında nələr dəyişib?
Yenidən işlənmiş versiya orijinal oyunun ruhunu və məzmununu qorumaqla yanaşı, bir sıra texniki təkmilləşdirmələr təqdim edir. İndi oyun müasir əməliyyat sistemləri və ultra-geniş monitorlar daxil olmaqla müxtəlif ekran icazələri ilə tam uyğunlaşdırılıb. Bundan əlavə, layihəyə “Steam” nailiyyətləri, bulud yaddaşı (cloud saves), “Steam Workshop” dəstəyi və “Steam Deck” ilə tam uyğunluq əlavə edilib. Kamera zoom-unun artırılması kimi kiçik, lakin vacib dəyişikliklər də oyun təcrübəsini yaxşılaşdırır.
Oyunun qiyməti və gələcək planlar
Hazırda oyunun qiyməti 240 rus rublu təşkil edir, lakin 15 oktyabr tarixinə qədər 20 faizlik endirimlə 192 rus rublu qarşılığında əldə etmək mümkündür. “Fulqrum Publishing” oyunun texniki vəziyyətinə nəzarət edəcəyini və zəruri yeniləmələri təqdim edəcəyini bəyan edib. Şirkət həmçinin seriyanın davamı olan “Магия крови 2” oyununun da yenidən nəşri üzərində işləyir.
