"OpenAI" şirkəti cümə günü yeni struktur dəyişikliyini elan edərək, bəzi sahələri birləşdirib və şirkətin prezidenti Qreq Brokmanı bütün məhsullar üzrə rəsmi rəhbər təyin edib. Şirkətdaxili məktuba əsasən, "OpenAI"-ın bu il üçün əsas məhsul strategiyası tamamilə süni intellekt agentlərinə yönəlib. Bu məqsədlə şirkət vahid agent platformasına sərmayə yatırmaq və "ChatGPT" ilə "Codex"i birləşdirərək istifadəçilərə vahid təcrübə təqdim etmək niyyətindədir.
Bu addımı reallaşdırmaq üçün təşkilati strukturda bir sıra dəyişikliklər həyata keçirilir. Xatırladaq ki, ötən ay AGI rəhbəri Fici Simo tibbi məzuniyyətə çıxdıqdan sonra Qreq Brokman məhsul strategiyasına nəzarəti öz üzərinə götürmüşdü. Eyni zamanda, biznes əməliyyatlarının idarə edilməsi Ceyson Kvon, Sara Frayar və Denis Dresserə həvalə edilmişdi.
Yeni struktur necə işləyəcək?
Fici Simonun yoxluğunda Qreq Brokmanın məhsul strategiyası və miqyaslandırma üzrə rəhbər rolu artıq rəsmiləşib. Onun rəhbərliyi altında dörd fərqli istiqamət fəaliyyət göstərəcək. Birinci istiqamət olan əsas məhsul və platformaya Tibo Sottio, ikinci istiqamət olan kritik korporativ sənayelərə isə "ChatGPT" rəhbəri Nik Törli rəhbərlik edəcək.
Üçüncü istiqamət səhiyyə, ticarət və şəxsi maliyyə kimi istehlakçı sahələrini əhatə edir və bu bölməyə Eşli Aleksandr başçılıq edəcək. Dördüncü istiqamət olan əsas infrastruktur, reklamlar, məlumat elmi və böyümə isə "OpenAI"-ın tətbiqlər üzrə texniki direktoru Vicay Raciyə həvalə olunub.
Nə üçün bu dəyişikliklər vacibdir?
Bütün bu dəyişikliklər "OpenAI"-ın potensial ilkin kütləvi təklif (IPO) ərəfəsində gəlir gətirən əsas sahələrə fokuslanmaq strategiyasının bir hissəsidir. İnvestorların mənfəət əldə etmək təzyiqi fonunda şirkət əlavə layihələrə resurs sərf etməyi dayandırır. Qreq Brokman qeyd edib ki, əsas məqsəd agentləri "ChatGPT" miqyasına çatdırmaq və fərdlərə, eləcə də təşkilatlara məhsullardan daha çox dəyər qazandırmaqdır.
