"OpenAI" şirkəti kiberhücumların qarşısını almaq məqsədilə yeni "Daybreak" süni intellekt təşəbbüsünü təqdim edib. Bu sistem potensial təhlükəsizlik boşluqlarını hakerlərdən əvvəl tapmaq və yamamaq üçün nəzərdə tutulub. Təşəbbüs çərçivəsində mart ayında istifadəyə verilmiş "Codex Security AI" agentindən istifadə olunur. Agent təşkilatın kodu əsasında təhlükə modeli yaradır, mümkün hücum yollarını diqqət mərkəzində saxlayır və yüksək riskli boşluqların aşkarlanmasını avtomatlaşdırır.
Bu yenilik, rəqib "Anthropic" şirkətinin "Claude Mythos" modelini elan etməsindən təxminən bir ay sonraya təsadüf edir. Qeyd edək ki, "Project Glasswing" təşəbbüsünün bir hissəsi olan həmin modelin ictimaiyyətə açıqlanması çox təhlükəli hesab edilmiş və yalnız qapalı şəkildə paylaşılmışdı. Lakin bu tədbirlərə baxmayaraq, bəzi icazəsiz şəxslər sistemə giriş əldə edə bilmişdilər. İndiyədək "OpenAI" şirkətinin analoji təhlükəsizlik məhsulu mövcud deyildi.
"Daybreak" yalnız bir süni intellekt modeli üzərində qurulmayıb. Şirkətin məlumatına görə, bu sistem ən bacarıqlı "OpenAI" modellərini, "Codex" sistemini və təhlükəsizlik tərəfdaşlarını bir araya gətirir. Layihəyə həmçinin keçən həftə istifadəyə verilməyə başlanan "GPT-5.5 with Trusted Access for Cyber" və "GPT-5.5-Cyber" kimi ixtisaslaşmış kiber modellər daxildir. Hazırda "OpenAI" daha güclü kiber modelləri tətbiq etmək üçün sənaye və hökumət tərəfdaşları ilə sıx əməkdaşlıq edir.
