"Nvidia" korporasiyası köhnə nəsil qrafik prosessorlar üçün 582.78 versiyalı təhlükəsizlik sürücüsünü təqdim edib. Bu yeniləmə "Maxwell", "Pascal" və "Volta" arxitekturaları üzərində qurulmuş videokartları əhatə edir. Qeyd etmək lazımdır ki, sözügedən modellər üçün "Game Ready Driver" dəstəyi 2025-ci ilin oktyabrında dayandırılsa da, şirkət 2028-ci ilin oktyabrına qədər kritik təhlükəsizlik boşluqlarını bağlamağa davam edəcəyini bildirib.
Yeni WHQL sertifikatlı sürücü 64-bitlik "Windows 10" və "Windows 11" əməliyyat sistemləri üçün əlçatandır. Masaüstü sistemlər üçün yeniləmə "GeForce GTX 745"-dən "GTX 980 Ti"-yə qədər, həmçinin "Pascal" əsaslı "GTX 1050"-dən "GTX 1080 Ti" modellərinə qədər geniş spektrli cihazları dəstəkləyir. Bundan əlavə, "Titan V", "Titan Xp" və "Titan X" kimi yüksək performanslı kartlar da yeniləmədən faydalanır.
Noutbuk istifadəçiləri üçün də dəstək təmin edilib: "GeForce GTX 900M", "GTX 1000" seriyaları və "MX110"-dan "MX350"-yə qədər olan modellər üçün sürücü yüklənə bilər. Şirkətin sentyabr ayı üzrə təhlükəsizlik bülletenində qrafik sürücülərdə və vGPU proqram təminatında aşkar edilmiş 114 müxtəlif boşluq qeyd olunub. Bu boşluqlardan biri kritik, 76-sı yüksək, 37-si isə orta təhlükə səviyyəsinə malikdir.
