Vaşinqton federal məhkəməsi tərəfindən verilən qiyabi qərara əsasən, Ceyms Uilyams (onlayn mühitdə “archbox” kimi tanınır) “Nintendo” şirkətinə 4,5 milyon ABŞ dolları ödəməlidir. Məhkəmə, həmçinin Uilyamsın pirat oyun kitabxanalarını yerləşdirdiyi iddia edilən onlayn mağazaları dərhal bağlamasını və müəllif hüquqlarını pozan sosial media hesablarını deaktiv etməsini əmr edib.
“Nintendo of America” şirkəti 2024-cü ildə qaldırdığı iddiada Uilyamsın r/SwitchPirates icmasının aparıcı moderatoru olduğunu bildirib. İddiaya görə, o, istifadəçiləri “Nintendo eShop” hədiyyə kartları və oyun nüsxələri ilə təmin etməyə təşviq edərək, bu faylları pirat mağazalarda yayılmaq üçün toplayıb. Hakim Loren Kinq qərarında qeyd edib ki, cavabdeh şəxs bu fəaliyyətin müəllif hüquqları qanunlarını pozduğunu bilə-bilə pirat proqram təminatının yayılmasına şərait yaradıb.
Məhkəmənin təyin etdiyi 4,5 milyon ABŞ dolları məbləğindəki cərimə, 30 müəllif hüququ ilə qorunan oyunun hər biri üçün 150 min ABŞ dolları hesablanaraq müəyyən edilib. Bu siyahıya “Animal Crossing: New Horizons”, “Luigi’s Mansion 3” və “Pikmin 4” kimi populyar oyunlar daxildir. Bu qərar “Nintendo” şirkətinin piratçılığa qarşı apardığı hüquqi mübarizədə növbəti uğuru kimi qiymətləndirilir.
