“Nintendo” şirkəti öz oyunları və avadanlıqları ilə bağlı piratçılığa qarşı mübarizədə növbəti qələbəsini qazanıb. Haaqa Dairə Məhkəməsi tərəfindən verilən qərara əsasən, “MIG Switch” və “MIG Dumper” cihazlarının, habelə onlarla bağlı proqram təminatının satışı Avropa İttifaqı ərazisində tamamilə qadağan edilib. Pərakəndə satıcılara bu məhsulların ticarətini dərhal dayandırmaq tapşırılıb.
“MIG Switch” sistemi necə işləyir?
Sözügedən sistem iki əsas komponentdən ibarətdir: “MIG Dumper” və “MIG Switch” adapteri. “Dumper” vasitəsilə orijinal kartriclərdəki oyun faylları kompüterə köçürülür və rəqəmsal formata çevrilir. Daha sonra bu fayllar SD-karta yazılaraq, adapter vasitəsilə “Nintendo Switch” konsolunda orijinal kartric kimi istifadə olunur.
İstehsalçılar bu sistemi rəsmi olaraq “ehtiyat nüsxələrin yaradılması” üçün nəzərdə tutulduğunu iddia etsələr də, istifadəçilərin böyük əksəriyyəti cihazdan pirat oyunların yayılması üçün istifadə edib. “Nintendo” isə bu cür manipulyasiyaların oyun təcrübəsinə və təhlükəsizliyə zərər vurduğunu vurğulayaraq, qanunsuz cihazlardan istifadə edən konsolları onlayn xidmətlərdən məhrum edir.
Bu qərar nə üçün vacibdir?
Şirkətin rəsmi açıqlamasında bu məhkəmə qərarı təkcə “Nintendo” üçün deyil, həm də oyun sənayesindəki digər tərtibatçılar üçün mühüm uğur kimi qiymətləndirilib. “Nintendo” bildirib ki, proqram təminatının mühafizəsini pozan cihazlar oyunların keyfiyyətini aşağı salır və yaradıcıların əməyini təhlükə altına qoyur. Şirkət oyunçuları bu cür qeyri-qanuni vasitələrdən uzaq durmağa çağırıb.
