"Netflix" şirkətinin həmtəsisçisi Rid Hastinqs təxminən 30 illik fəaliyyətindən sonra şirkəti tərk etməyi planlaşdırır. Cümə axşamı dərc olunan maliyyə hesabatında qeyd olunur ki, hazırda idarə heyətinin sədri vəzifəsini icra edən Hastinqs iyun ayında keçiriləcək illik yığıncaqda səlahiyyət müddəti başa çatdıqdan sonra yenidən namizədliyini irəli sürməyəcək.
1997-ci ildə "Netflix"in əsasını qoyan Hastinqs 1999-cu ildən 2023-cü ilə qədər baş direktor vəzifəsində çalışıb və daha sonra idarə heyətinin sədri olub. O, rəsmi açıqlamasında bildirib:
"Mənim 'Netflix'dəki əsl töhfəm tək bir qərar deyildi; bu, üzvlərin məmnuniyyətinə diqqət yetirmək, başqalarının miras ala və inkişaf etdirə biləcəyi bir mədəniyyət yaratmaq, həmçinin gələcək nəsillər üçün həm istifadəçilər tərəfindən sevilən, həm də son dərəcə uğurlu ola biləcək bir şirkət qurmaq idi."
Son aylar "Netflix" üçün olduqca hadisələrlə zəngin keçib. Şirkət "Warner Bros." studiyasını və "HBO Max" platformasını almaq üçün nəzərdə tutulan 83 milyard ABŞ dolları dəyərindəki müqavilədən imtina etdikdən sonra, mart ayında yayım xidmətinin qiymətini yenidən artırıb. Belə ki, ən ucuz reklamsız abunə planının aylıq ödənişi 17,99 ABŞ dollarından 19,99 ABŞ dollarına qaldırılıb. Bundan əlavə, platforma uşaqlar üçün "Playground" adlı oyun tətbiqini istifadəyə verib və birbaşa televizordan oynanıla bilən yeni "Jackbox" əyləncə oyunlarını sistemə əlavə edib.
