Rusiya kökənli Kipr studiyası "RainStyle games" tərəfindən hazırlanan "Midnight Watcher: Village" oyunu, oyunçuları Sibir tayqasının dərinliklərində yerləşən kimsəsiz bir kəndə aparır. Qorxu elementləri ilə zənginləşdirilmiş bu sağqalma simulyatorunda hadisələr uzaq və tərk edilmiş əraziyə nəzarət etmək üçün göndərilmiş növbətçi gözətçinin dilindən nəql olunur. Lakin baş qəhrəman çox keçmədən bu kimsəsiz ərazinin əslində tamamilə boş olmadığını kəşf edir.
Oyunun mexanikası iki əsas mərhələyə bölünür: sakit keçən gündüz və təhlükələrlə dolu gecə. Tərtibatçılar bu prosesi
"Hər gün bir mübarizədir. Hər səhər isə müvəqqəti bir nəfəs dərməkdir"sözləri ilə ifadə edirlər. Gündüz saatlarında gözətçi odun yığır, çay qaynadır, ehtiyatlarını yeniləyir və əraziyə baxış keçirərək sadə tapşırıqları yerinə yetirir. Kəndin müxtəlif yerlərində gizlədilmiş xəzinələri tapmaq mümkündür, lakin onları götürmək qaranlıq çökdükdən sonra əsl sahiblərinin diqqətini cəlb edəcək.
Gündüz narahat edilən gecə qonaqları mütləq baş qəhrəmanı ziyarətə gəlirlər. Bu cür varlıqlarla qarşılaşma heç bir yaxşı vəd etmir. Tərtibatçılar belə hallarda "işıq, duz, patron — tapdığınız hər şeydən" istifadə etməyi məsləhət görürlər. Əgər heç nə kömək etməsə, yeganə çıxış yolu qapıları bağlayıb ən yaxşısına ümid etməkdir. Yayımlanan treyler "YouTube" istifadəçiləri tərəfindən böyük maraqla qarşılanıb. Hətta istifadəçilərdən biri onu açıq dünyalı "Five Nights at Freddy's" adlandırıb.
"Midnight Watcher: Village" oyunu "PC" platforması üçün "Steam" mağazasında buraxılacaq. Layihənin dəqiq çıxış tarixi hələlik açıqlanmasa da, oyunun tam rusdilli lokalizasiyaya malik olacağı təsdiqlənib.
