"Microsoft" korporasiyası "Xbox" bölməsində növbəti irimiqyaslı restrukturizasiya prosesinə start verib. Bu dəyişikliklər çərçivəsində 268 əməkdaş işdən çıxarılır və bir sıra studiyaların fəaliyyət istiqaməti dəyişdirilir. Şirkətin rəsmi açıqlamasına görə, bu addımlar biznes vahidlərinin sayını azaltmaq və franşizaların gücləndirilməsi məqsədi daşıyır.
"Halo" franşizası üçün yeni dövr
Ən diqqətçəkən dəyişikliklərdən biri "Halo" franşizasının gələcəyi ilə bağlıdır. "Halo Studios" mövcud oyunları dəstəkləməyə davam etsə də, seriyanın növbəti böyük layihəsini "Activision" şirkəti hazırlayacaq. "Xbox"-un məzmun üzrə rəhbəri Matt Booty bildirib ki, bu məqsədlə "Call of Duty" komandasından ayrı, xüsusi bir qrup formalaşdırılacaq.
Struktur dəyişiklikləri və studiyaların birləşməsi
Restrukturizasiya çərçivəsində bir sıra digər mühüm addımlar da atılıb:
- "Activision" şirkəti "World’s Edge" və "Rare" studiyalarını öz nəzarətinə götürür.
- "Obsidian" studiyası "Bethesda" ilə əməkdaşlıq edərək yeni "Fallout" oyunu üzərində işləyəcək.
- "Turn 10" və "Playground Games" "Forza" və "Fable" layihələri üçün vahid studiya kimi birləşdirilir.
- "Microsoft Casual Games" bölməsi isə "King" şirkətinin tərkibinə keçir.
Şirkət rəhbərliyi, həmçinin "Ninja Theory" studiyasının bağlanması ehtimalını nəzərdən keçirdiyini bildirib. 2027-ci maliyyə ilinin sonuna qədər "Xbox"-da ümumilikdə 3200 iş yerinin ixtisar edilməsi planlaşdırılır ki, bu da cari prosesin hələ tam bitmədiyini göstərir.
