“Microsoft” şirkəti 25-ci ildönümünə özəl hazırladığı şəffaf yaşıl rəngli “Xbox” konsolunun rəsmi qiymətini müəyyən edib. 899 ABŞ dolları dəyərində olan xüsusi buraxılışın ilkin sifarişləri 27 avqust tarixində, saat 10:00-da (ET) başlayacaq. Bununla yanaşı, şirkət ən sadiq pərəstişkarlarına erkən sifariş üçün xüsusi bildirişlər göndərməyə başlayıb.
Konsol 13 noyabr tarixində satışa çıxarılacaq və dəstə daxilində eyni “OG Green” rəngində olan oyun nəzarətçisi, həmçinin “Halo: Campaign Evolved” oyununun tam versiyası yer alacaq. 1 TB yaddaşa malik olan bu “Xbox Series X” cihazlarının hər biri lazerlə nömrələnərək kolleksiya dəyəri daşıyacaq. Xüsusi buraxılışla birlikdə təqdim olunan nəzarətçini 79 ABŞ dolları qarşılığında ayrıca əldə etmək mümkündür və onun satışına 20 oktyabr tarixində başlanılacaq.
Bu konsolun təqdimatı necə keçib?
“Microsoft” bu xüsusi cihazı ilk dəfə iyun ayında keçirilən “Xbox Games Showcase” tədbirində elan etmişdi. “Xbox FanFest” zamanı şirkətin icraçı direktoru Asha Sharma gözlənilməz bir addım ataraq, tədbirdə iştirak edən və “fan” nişanı daşıyan şəxslərə bu konsoldan hədiyyə ediləcəyini açıqlamışdı. Konsolun satışa çıxarılması ərəfəsində şirkət həmçinin klaviatura, siçan və qulaqlıq kimi uyğun aksessuarlardan ibarət xüsusi kolleksiyanı da istifadəçilərə təqdim edib.
