"Microsoft" şirkəti Windows əməliyyat sistemində printerlərin idarə olunması yanaşmasını kökündən dəyişir. İndiyədək HP, Canon, Epson və Brother kimi istehsalçılar öz cihazları üçün xüsusi drayverlər təqdim edirdilər. İndi isə "Microsoft" bu asılılığı azaltmaq üçün Windows Ready Print texnologiyasına və standartlaşdırılmış IPP (Internet Printing Protocol) protokoluna keçid edir.
Bu dəyişiklik nəyi dəyişir?
15 yanvar 2026-cı il tarixindən etibarən "Windows Update" vasitəsilə yeni printer drayverlərinin buraxılışı dayandırılıb. 1 iyul 2026-cı il tarixindən isə Windows uyğun printerlərlə işləyərkən daxili IPP drayverinə üstünlük verməyə başlayıb. Bu addım sistemin daha stabil və təhlükəsiz işləməsini təmin etmək məqsədi daşıyır.
Köhnə printerlər üçün hansı risklər var?
Əsas problem Windows Protected Print Mode (Windows-un qorunan çap rejimi) ilə bağlıdır. Bu rejim yalnız sistemin öz infrastrukturundan istifadə edir və istehsalçıların drayverlərini tamamilə kənarlaşdırır. Əgər printeriniz IPP, IPP-over-USB və ya Mopria standartlarını dəstəkləmirsə, gələcəkdə onu istifadə etmək qeyri-mümkün ola bilər.
Gələcək planlar nələrdir?
Hazırda bu funksiya opsional olsa da, "Microsoft" gələcəkdə onu standart olaraq aktivləşdirəcəyini bəyan edib. 1 iyul 2027-ci il tarixinə planlaşdırılan son mərhələ ilə üçüncü tərəf drayver yeniləmələri yalnız təhlükəsizlik yamaları ilə məhdudlaşdırılacaq. İstifadəçilərə köhnə cihazların uyğunluğunu yoxlamaq və gələcək yeniləmələrə hazır olmaq tövsiyə edilir.
