"Microsoft" şirkəti uzun müddətdir ki, "Windows 11" əməliyyat sistemindəki bütün tənzimləmələri "İdarəetmə Paneli"ndən "Parametrlər" tətbiqinə köçürməyi vəd edir. Lakin 40 illik tarixə malik bu komponentdən mərhələli şəkildə imtina etmək heç də asan məsələ deyil. Şirkət keçid dövründə drayverlərin və ya cihazların işində yarana biləcək nasazlıqların qarşısını almaq üçün xüsusi tədbirlər görməlidir.
"Microsoft" şirkətinin dizayn üzrə direktoru Març Rocers "X" sosial şəbəkəsində köhnə elementlərin müasir tətbiqə köçürülməsi niyyətini təsdiqləyib. Müzakirələr zamanı istifadəçilər şəbəkə tənzimləmələri, həmçinin printer və skaner xüsusiyyətlərinin quraşdırılması kimi məsələlərdə köhnə panelin daha rahat olduğunu vurğulayıblar. Buna görə də, yeni tətbiqin kütləvi istifadəsi üçün ona əlavə təkmilləşdirmələr edilməsi tələb olunur.
Març Rocers istifadəçilərin bu mövqeyi ilə razılaşıb və risklərin böyük olduğunu bildirib. "Apple" şirkəti "macOS" sistemində dəyişikliklər edərkən üçüncü tərəf avadanlıqlarının dəstəyindən imtina edə bilsə də, "Microsoft" onilliklər əvvəl istehsal olunmuş cihazları və drayverləri dəstəkləməyi özünə borc bilir. Məhz bu səbəbdən paneldən bir gecədə xilas olmaq mümkün deyil. Hazırda cihazları idarə etmək və köhnə drayverləri əlavə etmək üçün istifadə olunan "Cihazlar Meneceri" hələ də "Parametrlər" bölməsinə daxil edilməyib.
Şirkət rəsmisi bütün tənzimləmələrin tam olaraq nə vaxt köçürüləcəyi ilə bağlı dəqiq tarix açıqlamayıb. Lakin "Windows" istifadəçiləri köhnə, lakin hələ də tələbat olan komponentlərin sistemdən qəfil yoxa çıxmasını sevmədikləri üçün bu prosesin ləngiməsi müsbət qarşılanır. "Microsoft" əmin olmalıdır ki, sadələşdirilmiş interfeys istifadəçiləri məhdudlaşdırmayacaq və ətraflı nəzarət vasitələri yeni sistemdə də qorunub saxlanılacaq.
