"Microsoft" şirkəti gələn həftə təqdim edəcəyi yeni yenilənmə ilə "Office" proqramlarında istifadəçiləri narahat edən "Copilot" düyməsini qeyri-aktiv etməyə imkan yaradacaq. Son həftələrdə "Word", "Excel" və "PowerPoint" sənədlərinin sağ aşağı küncündə peyda olan bu üzən düymə bir çox istifadəçinin, xüsusilə də "Excel" istifadəçilərinin ciddi narazılığına səbəb olmuşdu. Çünki həmin düymə işçi xanaların üzərini örtür və onu tamamilə ləğv etmək mümkün deyildi.
"Microsoft" şirkətinin tərəfdaş qrupu üzrə məhsul meneceri Katie Kivett istifadəçilərin narazılığını qəbul edərək bildirib:
"Bu yenilənmə ilə 'Office' proqramlarında 'Copilot' iştirakının artdığını görsək də, onun necə görünməsi ilə bağlı daha çox nəzarətə ehtiyac olduğunu da eşidirik. Əsas məqsədlərimizdən biri 'Copilot'u zamanla daha uyğunlaşan və çevik etmək olsa da, qısa müddətdə bəzi düzəlişlər həyata keçiririk."
Hazırda "Microsoft" üzən düyməni bir qədər kiçiltmək və daha az diqqət çəkən etmək üçün xüsusi yerləşdirmə seçimi təklif edir. Lakin gələn həftədən etibarən istifadəçilər "Dynamic Action Button" üzərinə sağ klikləyərək onu yuxarıdakı lentə daşıya biləcəklər və beləliklə, düymə sənədlərin üzərində qalmayacaq. Bu dəyişiklik, şirkətin "Windows 11" proqramlarından lazımsız "Copilot" düymələrini yığışdırmağa başlamasından cəmi bir ay sonraya təsadüf edir. Görünür, şirkət illərdir hər yerə süni intellekt düymələri əlavə etməyin faydadan çox narahatlıq yaratdığını anlamağa başlayıb.
