"DayOne" portalının jurnalistlərinin məlumatına görə, kompüter və "Xbox" konsolları üçün "Microsoft Store" rəqəmsal mağazasında "Wasteland Remastered" oyununun pulsuz paylanmasına başlanılıb. Maraqlıdır ki, "Microsoft", "inXile Entertainment" və oyunun rəsmi sosial şəbəkə hesabları bu barədə heç bir açıqlama verməyib. Bunun planlaşdırılmış bir aksiya, yoxsa sistem xətası olduğu məlum deyil. Buna görə də, istifadəçilərə pulsuz nüsxəni əldə etməyə tələsmək məsləhət görülür.
Normal şərtlərdə ABŞ seqmentində 15 ABŞ dolları qiymətinə satılan bu oyun, eyni zamanda "Game Pass" (Ultimate, Premium və PC Game Pass) abunəliyinə də daxildir. Xatırladaq ki, orijinal "Wasteland" oyunu 1988-ci ildə Brian Fargo-nun rəhbərliyi altında "Interplay" studiyası tərəfindən yaradılıb və əfsanəvi "Fallout" seriyasının yaranmasına zəmin hazırlayıb. Pulsuz təqdim edilən versiya isə klassik oyunun 2020-ci ildə yenidən işlənmiş variantıdır.
Oyunun süjet xətti nüvə müharibəsindən təxminən 100 il sonra, 2087-ci ildə cərəyan edir. Oyunçular "Səhra reyncerləri" dəstəsinin komandiri rolunda çıxış edərək çətin qərarlar qəbul etməli və vətəndaşları qorumalıdırlar. Yenilənmiş versiya istifadəçilərə müasir qrafika, təkmilləşdirilmiş səs effektləri, genişləndirilmiş saundtrek və qeympad dəstəyi təklif edir. Həmçinin, köhnə xətalar aradan qaldırılıb və rus dilinə mətn tərcüməsi əlavə edilib.
