"Microsoft" korporasiyası öz məhsul xəttini genişləndirərək, daha aşağı qiymətə sahib yeni "Surface Pro" və "Surface Laptop" modellərini istifadəçilərə təqdim edib. Yeni cihazların əsas fərqi operativ yaddaşın (RAM) 16 GB-dan 8 GB-a endirilməsidir. Bu dəyişikliklə 12 düymlük "Surface Pro" 849 ABŞ dolları, 13 düymlük "Surface Laptop" isə 949 ABŞ dollarından başlayan qiymətlərlə bazara çıxarılıb.
Xatırladaq ki, 2025-ci ildə təqdim olunan ilkin modellər 16 GB RAM və 256 GB yaddaşla təchiz edilmişdi. Lakin 2026-cı ilin aprel ayında "Microsoft" qiymətləri müvafiq olaraq 1049 və 1199 ABŞ dollarına qaldırmışdı. Yeni təqdim olunan modellər yaddaş həcminin azaldılması hesabına daha münasib qiymət təklif etsə də, texniki göstəricilərin qalan hissəsi dəyişməz qalıb.
Cihazlar hələ də 8 nüvəli "Snapdragon X Plus" prosessoru və 256 GB yaddaşla təchiz olunub. Buna baxmayaraq, 8 GB RAM həcmi "Microsoft"-un "Copilot Plus" adlı süni intellekt texnologiyasını dəstəkləmək üçün kifayət etmir. Bu funksiyadan yararlanmaq üçün minimum 16 GB operativ yaddaş tələb olunur. Ekspertlər qeyd edir ki, hətta bu endirimə baxmayaraq, yeni modellər 599 ABŞ dolları dəyərində olan və bazarda rəqabəti artıran "MacBook Neo" ilə müqayisədə hələ də baha hesab edilir.
