"Meta", "Google" ("YouTube"), "Snap" və "TikTok" şirkətləri ABŞ-ın Kentukki ştatındakı Breathitt County School District ilə məhkəmə çəkişməsini razılaşma yolu ilə başa çatdırıb. İddiaçılar sosial medianın yeniyetmələrin psixi sağlamlığına vurduğu zərərlə mübarizə xərclərinin texnologiya nəhəngləri tərəfindən ödənilməsini tələb edirdilər. Bu razılaşma "Meta"nın gənclərin psixi sağlamlığına təsiri ilə bağlı ardıcıl məhkəmə məğlubiyyətlərindən sonra baş tutub.
İyun ayında başlaması planlaşdırılan bu proses federal çoxölçülü məhkəmə çəkişmələri (MDL) çərçivəsində ilk sınaq işi olmalı idi. Hazırda ABŞ üzrə məktəb dairələri, ştatların baş prokurorları və fərdi şəxslər tərəfindən sosial media platformalarına qarşı oxşar iddialar irəli sürülüb. Məqsəd bir neçə nümunəvi işin münsiflər heyəti qarşısında sınaqdan keçirilməsi və yerdə qalan digər iddialar üçün razılaşma danışıqlarına istiqamət verilməsidir. Analoji proseslər hazırda Los-Ancelesdəki Kaliforniya ştat məhkəməsində də davam edir.
Tərəflər arasında əldə olunan razılaşmanın maliyyə şərtləri açıqlanmayıb. İddiaçıların vəkilləri Lexi Hazam, Previn Warren, Chris Seeger və Ronald Johnson birgə bəyanat yayaraq, əsas diqqətlərinin məhkəməyə müraciət etmiş digər 1200 məktəb dairəsi üçün ədalətin bərpasına yönəldiyini bildiriblər. "Meta"nın sözçüsü Andy Stone işin sülh yolu ilə həll edildiyini və şirkətin "Teen Accounts" kimi qoruyucu funksiyaların yaradılmasına diqqət ayırdığını vurğulayıb. "YouTube" və "Snap" nümayəndələri də məsələnin həllindən məmnun olduqlarını qeyd ediblər, "TikTok" isə şərh verməyib. Növbəti məhkəmə prosesinin iyul ayında Los-Ancelesdə başlaması gözlənilir.
