Çərşənbə axşamından etibarən valideynlər övladlarının "Instagram" platformasındakı fəaliyyətləri haqqında daha ətraflı məlumat əldə edə biləcəklər. "Meta" şirkəti Yeniyetmə Hesablarına (Teen Accounts) yeni funksiya əlavə edir. Bu yenilik sayəsində valideynlər övladlarının basketbol və ya moda kimi hansı ümumi mövzularla maraqlandığını görəcəklər. Şirkətin məlumatına görə, yaxın gələcəkdə yeniyetmələr öz alqoritmlərinə yeni maraq dairəsi əlavə etdikdə valideynlərə xüsusi bildirişlər göndəriləcək.
Xatırladaq ki, ötən ilin dekabr ayında "Meta" istifadəçilərə "Instagram" lentində daha çox və ya daha az görmək istədikləri mövzuları seçməyə imkan verən "Sizin Alqoritminiz" (Your Algorithm) funksiyasını təqdim etmişdi. Şirkətin son bloq yazısında qeyd olunur ki, yeniyetmə hesablarına sahib olan istifadəçilərin alqoritmə əlavə edə biləcəyi mövzular onsuz da məhdudlaşdırılıb. Belə ki, bu hesablarda göstərilən məzmun yalnız PG-13 (13 yaşdan aşağı uşaqlar üçün valideyn nəzarəti tələb edən) reytinqli filmlərin məzmununa uyğun olmalıdır.
Bundan əlavə, "Meta" "Instagram", "Meta Horizon", "Facebook" və "Messenger" tətbiqləri üçün nəzərdə tutulan valideyn nəzarəti alətlərini "Family Center" (Ailə Mərkəzi) adlı vahid mərkəzdə birləşdirdiyini elan edib. Artıq valideynlər bütün bu tətbiqlər üzrə nəzarəti təmin etmək üçün övladlarına sadəcə bir dəvət göndərə bilərlər. Yaxın aylarda "Family Center" platformasına yeniyetmələrin "Meta" tətbiqlərində keçirdikləri ümumi vaxtı göstərən daha geniş nəzarət alətlərinin əlavə edilməsi planlaşdırılır.
