ABŞ məhkəməsi "Google" tərəfindən süni intellekt botları hazırlayan "SerpApi" şirkətinə qarşı qaldırılan iddianı ilkin mərhələdə rədd edib. Axtarış nəhəngi "SerpApi"-ni "Rəqəmsal Minilliyin Müəllif Hüquqları Qanunu"nu (DMCA) pozmaqda və icazəsiz məlumat toplamaqda günahlandırırdı. Lakin məhkəmə qərarında qeyd olunub ki, "Google" axtarış nəticələrindəki kontentin sahibi deyil və hüquq sahiblərinin adından çıxış etdiyini sübut edə bilməyib.
Məhkəmə qərarı nəyi dəyişir?
Məhkəmənin bu qərarı internetdəki məlumatların əlçatanlığı baxımından mühüm presedent yaradır. "Google" iddia edirdi ki, "SerpApi" onların məlumat toplamaqdan qorunma texnologiyalarını aşaraq "Google Search API" vasitəsilə kontenti qanunsuz satır. Buna baxmayaraq, ekspertlər hesab edir ki, axtarış nəticələri müəllif hüquqları ilə qoruna bilməz və "Google"-un bu yanaşması internetin açıq prinsiplərinə ziddir.
"Reddit" və "Google"-un növbəti addımları
"Reddit" platforması da ötən ilin oktyabrında "SerpApi" və "Perplexity"-yə qarşı oxşar iddialar qaldırmışdı. "SerpApi" rəhbərliyi "Reddit"-i istifadəçilərin məlumatlarını qorumaq əvəzinə, sahib olmadığı kontentdən gəlir əldə etməyə çalışmaqda ittiham edib. "Google"-a isə məhkəmə tərəfindən iddia ərizəsində dəyişiklik etmək üçün 21 gün vaxt verilib.
"SerpApi" nümayəndələri bildiriblər ki, "Google" və "Reddit" internetin sahibi deyillər və bu cür hüquqi təzyiqlər açıq internet istifadəçiləri üçün təhlükə yaradır. Qeyd edək ki, hazırda "Nvidia", "Uber" və "Adobe" kimi texnologiya nəhəngləri "SerpApi"-nin müştəriləri sırasındadır.
