"Valve" şirkətinin həmtəsisçisi və prezidenti Geyb Nyuell, rəhbərlik etdiyi "Steam" rəqəmsal distribüsiya platformasının inhisarçı olması ilə bağlı səslənən ittihamları qəti şəkildə rədd edir. Uzun illərdir davam edən antiinhisar araşdırmaları və məhkəmə çəkişmələri çərçivəsində şirkət, bazardakı dominant mövqeyindən istifadə edərək tərtibatçılardan yüksək komissiya haqqı almaqda günahlandırılır.
Nyuellin mövqeyi və rəqabət mühiti
Geyb Nyuell 2023-cü ildə keçirilən məhkəmə iclasında istehlakçıların oyunları "Xbox", "Epic Games Store" və ya birbaşa tərtibatçılardan əldə edə biləcəyini qeyd edərək, bazarda geniş seçim imkanlarının olduğunu müdafiə edib. Lakin "Bloomberg" agentliyi tərəfindən yayılan daxili sənədlər və elektron məktublar, şirkətin qiymət paritetini qorumaq üçün tərtibatçılara təzyiq göstərdiyini ortaya qoyur.
Hansı faktlar gizlədilir?
- "Valve" şirkətinin "Ubisoft"-u "Rainbow Six Siege" oyununu "Steam"-dən çıxarmaqla hədələdiyi məlum olub. Buna səbəb oyunun "Ubisoft"-un öz mağazasında daha ucuz qiymətə təklif edilməsi olub.
- 2017-ci ildə "Middle-earth: Shadow of War" oyununun satış qiymətlərinin digər platformalarda daha aşağı olması səbəbindən "Steam"-dəki ilkin sifarişləri dayandırılıb.
Bundan əlavə, fevral ayında Nyu-York ştatının hakimiyyət orqanları "Valve"-i "Counter-Strike 2", "Team Fortress 2" və "Dota 2" oyunlarındakı "lootbox"-lar vasitəsilə qeyri-qanuni qumar oyunları təşkil etməkdə ittiham edib. Şirkət bu ittihamların hamısını rədd edərək öz mövqeyini qorumağa davam edir.
