"Playground Games" studiyasının yeni açıq dünya yarış ralli oyunu olan "Forza Horizon 6" rəsmi relizinə dörd gün qalmış premium nəşr sahibləri üçün əlçatan olub. "Steam" platformasında erkən girişin ilk saatlarında oyun 3,8 min (kənar satınalmalarla birlikdə 4,4 min) rəy toplayıb. Hazırda layihənin reytinqi 66 % (63 %) təşkil edir və bu, "qarışıq" nəticə kimi qiymətləndirilir.
İstifadəçilər əsasən texniki nasazlıqlardan, o cümlədən oyunun işə düşməməsindən, zəif məhsuldarlıqdan və qəfil dayanmalardan şikayətlənirlər. Xüsusilə, tam uyğunluq vəd edilməsinə baxmayaraq, "Steam Deck" konsolunda ciddi problemlər yaşanır. -dicko adlı istifadəçi məyusluğunu belə ifadə edib:
"Oyundan çox məyusam. Boşa xərclənmiş pul və zamandır. Erkən giriş alarkən sizin problemlərinizi həll etməyi yox, bütün dörd gün ərzində oynamağı planlaşdırırdım."
Mənfi rəylərlə yanaşı, oyunun müsbət tərəfləri də vurğulanır. Oyunçular Yaponiyanın ab-havasını, rəngarəng açıq dünyanı, geniş avtomobil parkını və yüksək keyfiyyətli qrafikanı tərifləyirlər. Bütün texniki çətinliklərə rəğmən, "Forza Horizon 6" tam relizdən əvvəl "Steam"də 170,5 min nəfərlik pik onlayn göstəricisinə çataraq seriyanın tarixində ən yaxşı nəticəni göstərib. Əvvəlki rekord 81 min oyunçu ilə "Forza Horizon 5" oyununa məxsus idi.
Tənqidçilər tərəfindən 89−92 % bal ilə qiymətləndirilən layihənin rəsmi buraxılışı 19 may tarixində "PC" ("Steam", "Microsoft Store"), "Xbox Series X", "S" və "Game Pass" abunəliyi üçün baş tutacaq. "PS5" istifadəçiləri isə oyunu 2026-cı ildə əldə edə biləcəklər.
