Məşhur "Eve Online" oyununun yaradıcısı olan İslandiya studiyası "Pearl Abyss" şirkətindən müstəqilliyini geri aldıqdan sonra rebrendinq etmək qərarına gəlib. Təxminən 30 illik fəaliyyətdən sonra "CCP Games" rəsmi olaraq adını dəyişərək "Fenris Creations" olub. Şirkətin baş direktoru Hilmar Veigar Petursson bu qərarın arxasında dayanan əsas səbəbləri açıqlayıb.
Rebrendinqə səbəb olan əsas amil ingilisdilli dünyada "CCP" abbreviaturasının tanınması ilə bağlı yaranan problemlərdir. Belə ki, bu qısaltma eyni zamanda 100 milyondan çox üzvü olan və Çinin hakim siyasi qüvvəsi sayılan Çin Kommunist Partiyası (Chinese Communist Party - CCP) mənasını verir. "GamesIndustry.biz" nəşrinə müsahibə verən Petursson qeyd edib:
"Bu, girmək istəmədiyim bir döyüşdür. 'CCP' adlandırılmaq hüququ uğrunda Çin Kommunist Partiyası ilə mübarizə aparmayacağam. Vəziyyət hələ ciddi deyil, lakin hər şeyin hara getdiyini hiss edirəm. Onsuz da hazırda bir çox dəyişikliklər edirik, buna görə də ən uyğun zamandır."
Yeni "Fenris Creations" adı həm şirkətin fəaliyyəti, həm də İslandiya mədəniyyəti ilə sıx bağlıdır. Bu ad Skandinaviya mifologiyasındakı nəhəng canavar Fenrir (Fenris) ilə əlaqədardır və yaradılışla məhvin daxili əlaqəsini simvolizə edir ki, bu da "Eve Online" üçün mühüm mövzudur. Baş direktor bu fəlsəfəni belə izah edib:
"Gəmilər partlayanda onların məhvində gözəl bir şey olur. Bizim üçün bu adda dərin və sərt bir məna var. Etdiyimiz işi ən yaxşı necə ifadə edəcəyimiz barədə uzun müddət düşündük."
