"Energizer" şirkəti dünyada ilk dəfə olaraq udulduqda daxili yanma riskini tamamilə aradan qaldıran yeni litium batareyalarını nümayiş etdirib. Ultimate Child Shield seriyasına daxil olan bu məhsullar bu gündən etibarən 2032, 2025 və 2016 ölçülərində satışa çıxarılıb. Bu batareyalar adətən pultlarda, geyilə bilən cihazlarda və "Apple" şirkətinin "AirTags" kimi izləyicilərində istifadə olunur.
Əksər hallarda udulmuş batareyalar həzm sistemindən heç bir zərər vermədən keçir. Lakin onlar qida borusunda ilişib qalarsa, boğulma təhlükəsindən daha ciddi fəsadlar yarada bilər. Batareya tüpürcəklə təmasda olduqda elektrik cərəyanı yaradır və bu da cəmi bir neçə saat ərzində həyat üçün təhlükəli olan qələvi toxuma yanıqlarına səbəb ola bilər.
"Energizer" yeni seriyanın cərəyan və təhlükəli kimyəvi reaksiyaların qarşısını necə aldığını tam açıqlamasa da, məhsul bir neçə əlavə təhlükəsizlik tədbiri ilə təchiz edilib. Uşaqların aça bilməyəcəyi qablaşdırmadan əlavə, düymə batareyaları udulmanın qarşısını almaq üçün "Nintendo Switch" kartriclərində olduğu kimi acı maddə ilə örtülüb. Həmçinin, tüpürcəklə təmas zamanı ağzı mavi rəngə boyayan qida boyası batareyanın udulduğunu dərhal xəbər verir. Şirkət ciddi yanma riskinin aradan qaldırıldığını bildirsə də, batareyanın udulması hallarında dərhal tibbi yardıma müraciət etməyi tövsiyə edir. Qeyd edək ki, xəbərdaredici mavi boya ev heyvanları üzərində də effektiv işləyir.
