"SpaceX" şirkətinin rəhbəri Elon Musk, şirkətin süni intellektlə təchiz edilmiş smartfon prototipi hazırladığı barədə yayılan məlumatları "tamamilə yalan" adlandıraraq təkzib edib. Bu iddialar ilk dəfə "The Wall Street Journal" tərəfindən yayımlanıb və sözügedən cihazın investorlara təqdim edildiyi bildirilib.
İddialara görə, prototip "iPhone"-dan daha nazik dizayna malik olmalı və "Qualcomm" şirkətinin "Snapdragon" prosessoru ilə işləməli idi. Bundan əlavə, cihazın "xAI" tərəfindən dəstəklənən xüsusi süni intellekt əməliyyat sistemi ilə təchiz ediləcəyi qeyd olunurdu. Lakin Elon Musk bu xəbərləri rəsmi olaraq təkzib edib.
SpaceX mobil rabitə bazarına daxil olurmu?
Smartfon xəbərləri ilə yanaşı, "Financial Times" qəzeti "SpaceX"-in baş əməliyyat direktoru Gwynne Shotwell-in investorlara şirkətin "Starlink" peyk şəbəkəsinə inteqrasiya olunmuş mobil xidmətə başlamağı düşündüyünü dediyini bildirib. Bəzi analitiklər isə şirkətin "T-Mobile"-ı satın ala biləcəyini ehtimal edirlər.
Elon Musk keçmişdə smartfon istehsalı ideyasına skeptik yanaşdığını dəfələrlə vurğulayıb. O, ötən il keçirilən tədbirlərin birində telefon hazırlamaq fikrinin onu narahat etdiyini bildirsə də, zərurət yaranarsa, bunu istisna etməyəcəyini qeyd etmişdi. Hazırda "Starlink" şirkətin yeganə gəlirli biznes sahəsi olaraq qalır.
