Yüksək sürətli motorların istehsalı ilə tanınan "Dyson" şirkəti ən yeni robot tozsoranında öz motorundan istifadə etmədiyini "The Verge" nəşrinə təsdiqləyib. Şirkətin baş dizayn meneceri Nathan Lawson McLean bildirib ki, bu yaxınlarda təqdim edilən "Spot & Scrub Ai" modeli müştərək mühəndislik işinin nəticəsidir. Cihazın həm yeni lidar əsaslı naviqasiya sistemi, həm də vakuum motoru üçüncü tərəf tərəfindən hazırlanıb.
"Bu, bizim V10 motorlarımızdan biri deyil, tərəfdaşımızın texnologiyalarından biridir"- deyə Lawson McLean vurğulayıb.
Bəs nə üçün "Dyson" özünün ən məşhur texnologiyasından imtina edib? Lawson McLean-in sözlərinə görə, bunun əsas səbəbi sürət və xərclərlə bağlıdır. Şirkət nəm, quru və özünü təmizləyən cihazlar bazarına sürətlə daxil olmaq istəyib. Qeyd edək ki, "Dyson" 2000-ci illərin əvvəllərindən robot tozsoranlar inkişaf etdirsə də, hazırda "Roborock", "Ecovacs" və "iRobot" kimi rəqiblərindən illərlə geridə qalır.
Yeni tərəfdaşlıq hansı şirkətlə qurulub?
"Dyson" əməkdaşlıq etdiyi şirkətin adını açıqlamasa da, sənaye müşahidəçiləri bunun "Shenzhen Picea Robotics" olduğunu ehtimal edirlər. Bu şirkət həmçinin "Xiaomi", "Anker" və "Shark" kimi markalarla da işləyir. Əsas komponentlərin istehsalının autsorsinq edilməsi robot tozsoran bazarında qeyri-adi hal olmasa da, brendini yüksək sürətli motorlar üzərində quran bir şirkət üçün bu addım olduqca təəccüblüdür.
Əvvəlki modellərlə müqayisədə nələr dəyişib?
Şirkətin əvvəlki "360 Eye" və "360 Vis Nav" modelləri güclü "Dyson" motorları ilə təchiz edilsə də, avtonom hərəkət etməkdə çətinlik çəkirdi. Hər iki cihaz yavaş və etibarsız olan kamera əsaslı vSLAM naviqasiyasından istifadə edirdi. Yeni "Spot & Scrub Ai" modelində isə daha etibarlı lidar texnologiyası tətbiq edilib. Lakin "The Verge" tərəfindən aparılan sınaqlar göstərib ki, yeni cihazın təmizləmə performansı, xüsusilə xalça üzərində əvvəlki modellərdən əhəmiyyətli dərəcədə zəifdir.
"Dyson" mühəndisliyi cihazın hansı hissəsindədir?
Bütün bunlara baxmayaraq, Lawson McLean iddia edir ki, cihazın hava kanalları və təzyiq sistemləri tamamilə "Dyson" mühəndisliyinin məhsuludur. Bundan əlavə, robotda süni intellekt əsaslı ləkə aşkarlama, 12 nöqtəli nəmləndirmə sistemi və "Cyclonic" torbasız dok stansiyası kimi mövcud "Dyson" texnologiyaları yer alır. O, bu cihazı şirkətin bazarda rəqabətədavamlı qalması üçün atılmış bir "balanslaşdırma addımı" adlandırıb.
