On il əvvəl 400 ABŞ dolları qiymətində olan orijinal "Supersonic" modeli ilə saç baxımı bazarında inqilab edən "Dyson", indi daha kiçik və ucuz versiya ilə geri dönür. Yeni təqdim edilən "Supersonic Travel" modeli həm işgüzar səfərlər, həm də idman zalına gedənlər üçün nəzərdə tutulub. Cihazın qiyməti 299,99 ABŞ dolları təşkil edir.
Şirkətin məlumatına görə, yeni fen əvvəlki modellə müqayisədə 32 faiz daha kiçik və 25 faiz daha yüngüldür. Bu ölçülər onun əl çantalarına və səyahət baqajlarına asanlıqla yerləşməsinə imkan yaradır. Cihaz orijinal "Supersonic" ilə eyni əsas texnologiyadan istifadə etsə də, artıq olduğunuz ölkəyə uyğun olaraq gərginliyi avtomatik tənzimləyə bilir. Köhnə modelin istifadəçiləri üçün sevindirici hal odur ki, yeni fen əvvəlki başlıqlarla tam uyğundur.
"Dyson" saç baxımı bazarında necə rəqabət aparır?
Qeyd etmək lazımdır ki, bu, seriyanın ilk yenilənməsi deyil. 2024-cü ildə "Dyson" peşəkar stilistlər üçün nəzərdə tutulmuş 569,99 ABŞ dolları dəyərində "Supersonic r" modelini təqdim etmişdi. Həmin cihaz bilək ağrılarını azaltmaq üçün daha incə dizayna və istiliklə hava axınını avtomatik tənzimləyən RFID başlıqlara malik idi.
İlk "Supersonic" modelindən bəri şirkət saç baxımı sektoruna ciddi sərmayə yatırıb. Bura məşhur "Airwrap", "Corrale" və "Airstrait" kimi cihazlar daxildir. Bu məhsulların populyarlığı "Shark Flexstyle" kimi rəqib cihazların yaranmasına səbəb olub. Həmçinin, "L’Oréal" şirkəti də yaxın vaxtlarda "Colorsonic", "AirLight Pro" və "Light Straight" məhsulları ilə bu bazara daxil olub.
Maraqlıdır ki, "Dyson" şirkətinin gözəllik sənayesindəki fəaliyyəti yalnız qadcetlərlə məhdudlaşmır. Hazırda marka saç yağları, serumlar, formalaşdırıcı kremlər və baş dərisi üçün müalicəvi vasitələr də istehsal edir.
