Özünün 30 illik yubileyini qeyd edən "Electronic Arts"-a məxsus "Criterion Games" studiyası fəaliyyət istiqamətində ciddi dəyişiklik edib. Şirkət rəhbərliyi artıq yarış janrındakı layihələrin geridə qaldığını və studiyanın bütün resurslarının "Battlefield" seriyasının inkişafına yönəldiyini bildirib.
2022-ci ildə "Need for Speed Unbound" oyununun buraxılmasından sonra "Criterion Games" birbaşa "Battlefield 6" üzərində işləməyə başlayıb. 2025-ci ilin avqust ayında isə studiya rəsmi olaraq "Criterion: a Battlefield Studio" adlandırılıb. Bu dəyişiklik studiyanın keçmiş yarış irsinə son qoyulduğunu təsdiqləyir.
Nə üçün bu dəyişiklik baş verdi?
"Battlefield" studiyalarının Avropa üzrə vitse-prezidenti Rebekka Kutaz qeyd edib ki, studiyanın güclü tərəfləri olan kinematoqrafik təsir və intensiv oyun təcrübəsi artıq yalnız şuter janrında tətbiq olunur. Onun sözlərinə görə, əvvəllər avtomobillərə üstünlük verilsə də, hazırda komanda tamamilə "Battlefield" ekosisteminə köklənib.
"IGN" mütəxəssisləri hesab edir ki, "Need for Speed Unbound" studiyanın tarixində sonuncu yarış oyunu olaraq qalacaq. Baxmayaraq ki, 2025-ci ilin qışında Vins Zampella seriyanın yeni formatda geri dönəcəyinə işarə etmişdi, "Criterion Games"-in bu prosesdə iştirakı artıq gözlənilmir.
