"C64 Ultimate" modelinin yaradıcıları 1980-ci illərin ikonik fərdi kompyuterinin yeni versiyasını təqdim ediblər. 1982-ci ildə debüt edən orijinal "Commodore 64" cihazı, 1986-cı ildə daha incə korpus və müasir rəng sxemi ilə seçilən "Commodore 64C" ilə əvəz olunmuşdu. İndi isə eyni ənənəni davam etdirən "Commodore 64C Ultimate" modeli istifadəçilərə təqdim edilir. Yeni cihaz sələfinin funksionallığını qoruyaraq yalnız vizual yeniliklər təklif edir.
Yeni kompyuterin xarici görünüşünü orijinala tam uyğunlaşdırmaq üçün istehsalçılar 40 il əvvəl istifadə edilmiş eyni plastik inyeksiya qəliblərini yenidən əldə ediblər. "Commodore 64C Ultimate" modelinin korpusunda ərimiş plastikin qəlib daxilində qeyri-bərabər soyuması nəticəsində yaranan zəif yarımdairəvi izlər belə qorunub saxlanılıb. Bu detallar cihazın orijinallığını sübut edən və saxtalaşdırılması olduqca çətin olan xüsusiyyətlərdir.
Müasir tələblərə cavab vermək üçün cihaza Wi-Fi, USB və HDMI portları əlavə edilib. Bununla yanaşı, kompyuter 1986-cı il modelinin klassik portlarını da özündə saxlayır və köhnə disket və kaset sürücüləri ilə tam uyğun işləyir. Cihazın ilkin sifarişləri artıq başlayıb və qiyməti 299,99 ABŞ dolları təşkil edir. LED işıqlandırma, şəffaf korpus və qızılı düymələr kimi əlavə xüsusiyyətlərə malik premium versiyaların qiyməti isə 499,99 ABŞ dolları səviyyəsinə çatır. Çatdırılmaların sentyabr ayında başlanması planlaşdırılır.
